Gjatë ditës së sotme Lëvizja Vetëvendosje publikoi një sondazh se si mund të jenë rezultatet nëse shkohet prapë në zgjedhje.
Sipas këtij sondazhi, që nuk i dihet se kush e ka bërë, LVV do të jetë e para me 42%, kurse LDK e dyta me 21%
Anëtari i kryesisë së Lidhjes Demoraktike të Kosovës, Florian Dushi ka reaguar pas publikimit të sondazhit.
Në postimin e tij në Facebook, Dushi ka shkruar se VV po mundohet ta detyrojë LDK-në të futet në koalicion ‘sipas kushteve të diktuara nga ta’.
“Dështimi që përmes presionit publik të organizuar e të orkestruar ta detyrojnë LDK-në të futet në koalicion sipas kushteve të diktuara nga VV, po i shtyen të duken qesharak si në paraqitje ashtu edhe në metoda”, thuhet në reagimin e Dushit.
Dushi këto sondazhe i ka quajtur të fabrikuara.
“Së fundmi, bashkë me “kërcënimin” për zgjedhje, kanë filluar të publikojnë sondazhe të fabrikuara (vizatuara) sipas dëshirës së tyre, sa për t’u vetkënaqur bashkë me proletarët e tyre trushpërlarë”, ka shkruar Dushi.
Indeksonline kontaktoi me anëtarin e kryesisë së LDK-së dhe njëkohësisht kryetarin e Lipjanit, Imri Ahmeti.
Ai u shprehë se është çështje e LVV-së se çka mendojnë në këtë situatë. Ahmeti, po ashtu, shtoi se nëse shkohet në zgjedhje të reja, atëherë rezultatet do të jenë të njëjtat sikurse të 6 tetorit.
Kryetari i Lipjanit u shprehë se nuk e sheh të nevojshme që LDK të reagoj për këtë sondazh.
“Nuk e kam ide se a do të ketë reagim, as nuk e shohë të nevojshme të ketë reagime. Subjektet politike mund të bëjnë sondazhe siç është e zakonshme për nevoja të veta.”
“Momentumin politikë kanë tendenca pak këto opinione të ndryshme nuk kanë impakt fare në vendimmarrjen tek ne dhe nuk kanë impakt në vendimmarrjen e tërësishme si subjekt politik i LDK-së.”
“Është çështje e tyre se çfarë arsye dhe çka mendojnë me këtë situatë. Duhet llogaritur që edhe pas zgjedhjeve janë këto që janë në kuptimin e rezultateve të fundit, mund të lëvizë plus apo minus kurdoqoftë, por nëse ka tendencë të ndërrohen partnerët pas zgjedhjeve është çështje tjetër.” , tha Ahmeti.
Tutje, ai shtoi se ky sondazh nuk do të ndikoj në prishjen e raporteve aktuale mes LDK-së dhe LVV-së.
“Nuk e besoj se mund të ndikoj kjo në prishjen e raporteve aktuale, por nëse tendenca është të shkohet në zgjedhje, ne e kemi të qartë që pas zgjedhjeve sillet ky rezultat i subjekteve politike e ndërtimit të partneriteti të ardhshëm.”
“Nuk mund të ketë fitues absolut. Kërkimi që përmes zgjedhjeve të krijohen situata të reja për të provuar partneritet të reja është çështje tjetër.”, u shprehë ai.
Ahmeti në fund tha se sipas tij nuk është e nevojshme të shkohet në zgjedhje të reja, pasi rezultatin e zgjedhjeve e kemi dhe se pak a shumë të njëjtit partnerë do të jenë që do të sillen pas zgjedhjeve, shkruan Indeksonline.
Që nga mbarimi i zgjedhjeve të 6 tetorit, dy partitë LDK dhe LVV nuk kanë arritur të gjejnë një gjuhë të përbashkët për të arritur marrëveshje për koalicionin e ardhshëm qeverisës.
