Mbrëmë, aktorët e Teatrit të qytetit “Bekim Fehmiu” në Prizren, shfaqën Premierën e dramës për fëmijë, “Fillim me gëzim” të autorit S.J. Marshak, në regji të Melihate Qena, shkruan InLajmi.
Një zonjë udhëton me tren që të arrij deri tek nipi i saj Maku, për t’ia dhënë një dhuratë të çmuar, të cilën e emërton me emrin Minak. Edhe pse dhuratën e kishte ruajtur mirë në bagazhin e saj, sapo arrijnë në stacion, dhurata humbet. Dhe, kështu fillon e gjithë storja për bagazhin dhe dhuratën e zonjës, ku aktorët në skenë; Edona Sopaj, Alban Krasniqi, Hajat Toqilla, Liridona Shehu, Alban Qela, Alban Morina dhe Xhevdet Doda, me një lojë të bukur, e të kombinuar për mrekulli nga regjisorja e njohur e skenave tona për fëmijë, Melihate Qena, publikut në sallë, i afruan një shfaqje të shkëlqyer.
Po ashtu edhe muzika nga Xhevdet Gashi, kostumet e punuar nga Samka Feri, skenografia e Petrit Bakallit dhe kukullat nga Valdet Rama, ishin në funksion të këtij realizimi të mrekullueshëm skenik.
Si mësuam nga Fetah Paqarizi, drejtor i Teatrit të qytetit “Bekim Fehmiu”, gjatë ditëve në vazhdim, shfaqja “Fillim me gëzim” do te jepet edhe për nxënësit e shumë shkollave, në qytet dhe rrethinë. Osman Goranci/InLajmi
