Policia njoftoi se ka arrestuar sot një shtetas në Lezhë, i cili në emër të qeverisë ka krijuar llogari në Facebook, duke mbledhur shuma monetare si ndihma për të përballuar dëmet nga tërmetit.
I ndaluari Arian Mali, 30-vjeç kishte hapur një llogari me emrin “Rilindja” duke përfituar fonde nga solidariteti i donatorëve të ndryshëm. “Në këtë faqe, ky shtetas, ka postuar një status në emër të Kryeministrit, duke u bërë thirrje qytetarëve për solidarizim duke kontribuuar në vlera monetare në dy numra llogarie, të cilat ky shtetas i kishte publikuar në këtë status” tha Zv/drejtoresha e përgjithshme e Policisë së Shtetit, Aida Hajnaj.
“Gjatë kësaj kohe të shkurtër qytetarë të ndryshëm kanë rënë pre e këtij mashtrimi duke bërë derdhje shumash të ndryshme” shtoi ajo. Policia thekson se shtetasit që do të tentojnë të përfitojnë nga situata e fatkeqësisë nuk do të tolerohen. Nga ana tjetër, ajo përsëriti thirrjen se rruga e vetme për donacione rreth tërmetit është nëpërmjet portalit e-Albania.
“Policia e Shtetit, duke shprehur solidaritetin e plotë me të gjitha familjet e dëmtuara, mbetet e angazhuar maksimalisht, në misionin e saj në shërbim të qytetarëve, raporton RTSH.
Për çdo denoncim apo sinjalizim të çfarëdolloj abuzimi apo shkeljeje të ligjit, telefononi në numrin 112” tha zonja Hajnaj.