Kryeministri i Shqipërisë, Edi Rama, lutet që të mos dëgjohen ata që spekulojnë me episode sporadike konfuzioni të natyrshëm në situatën e jashtëzakonshme ku jemi.
“Ju lutem, ju lutem mos dërgoni më ndihma ushqimore dhe rroba. Kanë ardhur pafund dhe hapësirat e magazinimit po shterren. Në portin e Durrësit s’ka më kapacitet për depozitimin e tyre dhe nevoja është përmbushur e tejkaluar, falë shumë njerëzve, sipërmarrjeve, organizatave, institucioneve brenda e jashtë! gjynah nga zoti të skadojnë a të kalben nga mospërdorimi”.
Kështu shkruan Kryeministri Edi Rama në thirrjet ndaj atyre që duan të ndihmojnë, teksa shton, “faleminderit shumë, me zemër, por ju lutem mirëkuptimin tuaj”.
Kreu i qeverisë garanton se nuk ka vjedhje ndihmash e as shitje ndihmash, në asnjë lloj niveli shqetësues, por bëhet fjalë për episode krejt të parëndësishme për nga përmasa apo për shfaqje e postime provokatorësh të pashpirt, në lumin e ndihmave të solidaritetit fantastik.
“Ju lutem kuptoni se problemi i emergjencës fillestare të ushqimit dhe veshmbathjes se fatkeqëve, është tanimë i zgjidhur dhe i tejkaluar falë jush. Ju lutem solidarizohuni për të përballuar luftën e vertetë për strehimin e tyre dinjitoz. Kontribuoni me një shumë sado modeste, sipas mundësisë suaj në adresën unike e-albania.al/dhuro dhe ju lutem, mos dëgjoni të paudhët që hedhin dyshime e mbjellin mërzi mbi kupën e shpirtit tuaj të dëshpëruar, duke aluduar lloj-lloj ligësish e pabesish…”, deklaron kreu i qeverisë.
Ai fton të besohet se, ky është momenti i ballafaqimit me Zotin e shqiptarëve dhe nuk është ora e kujtdo që e mohon atë Zot, duke bërë politikë apo kallur mërzinë e vogëlsisë së vet, në shpirtin bujar.
“Zoti bekoftë Shqipërinë dhe ju të gjithë pa dallim e frenoftë gjuhën e kujtdo s’di çfarë flet në këtë orë sprove të rëndë për forcën e zemrës shqiptare”, shkruan Edi Rama. /InLajmi