Që nga dje grupi i tifozëve ”Plisat” nga Prishtina janë bashkuar për t’i dalë në ndihmë mëmë Shqipërisë.
Ata përveç që kanë siguruar ushqim, veshmbathje dhe barna aktivitetin e tyre e kanë vazhduar edhe duke i siguruar edhe strehimin familjeve të të prekurve nga tërmeti. Çdo dy orë kamionët nisen nga Kosova për në Shqipëri. Plisat janë në bashkëpunim me Kryqin e Kuq në Shqipëri, ndihmat nga Kosova për familjet e prekura nga tërmeti kanë nisur qysh dje dhe do të vazhdohet edhe më tutje.
Dinë Metaj nga grupi i tifozëve të Prishtinës, Plisat për gazetën online InLajmi ka thënë se kamionët me ndihma çdo dy orë nisën për në Shqipëri duke i siguruar familjarëve të të prekurve nga tërmeti, ushqim, veshmbathje dhe barna.
Ai theksoi se “Plisat” kanë siguruar edhe strehimin e familjeve në nevojë, deri më tani 50 persona vetëm se janë strehuar.
“Përveç pakove ushqimore dhe veshmbathjeve dhe barnave që jena duke i dërgu për Shqipëri jena tub o edhe strehime, ka njerëz që janë paraqitë vullnetar, dje i kena strehu 30 persona në hotel Ora, sot në ora 4 të mëngjesit priten edhe persona të tjerë, deri tash 50 persona keni arrit me i strehu në Boge”, theksoi ai.
Albert Kastrati anëtari tjetër nga “Plisat”, ka theksuar se gjithçka që kanë nevojë familjet e prekura nga tërmeti po sigurohen dhe po transportohen direkt, transporti nuk është problem dhe çdo dy ore po dërgohen ndihmat për Shqipërinë.
“Kanë pru shumë gjera ushqimore, kanë pru rroba, batanije krejt senet çka ju nevojiten atyre i kanë pru. Çdo dy ore po duhet me I nise kamionët për në Shqipëri. Nuk kemi probleme me transport, na plisat nuk pagujna as taks as kurgjo, ndihma kanë pru bizneset kanë pru qytetaret kanë pru krejt”, tha Kastrati. /InLajmi
