Shërbimi Korrektues i Kosovës me një ceremoni solemne dhe një ekspozitë në Shtëpinë e Kulturës në Lipjan ka shënuar 20-vjetorin e themelimit të saj. Zyrtarët e këtij institucioni kanë treguar se prej 20 vjetësh me angazhim e përkushtim po i menaxhojnë disa qendra korrektuese në nivel të vendit, në mesin e tyre edhe në qytetin e Lipjanit.
Ismet Fekaj, udhëheqës i instruktorëve dhe trajnimeve në qendrën korrektuese në Dubravë, njëherësh organizator i kësaj ceremonie, ka prezantuar një varg aktivitetesh të cilat i bëjnë të burgosurit nëpër qendrat korrektuese në Kosovë. Sipas tij, aktivitete të tilla janë mbajtur edhe në Istog dhe Prishtinë për nder të shënimit të 20-vjetorit të themelimit të Shërbimit Korrektues të Kosovës, shkruan Koha net.
”Shërbimi Korrektues i Kosovës për nder të 20-vjetorit të themelimit ka organizuar këtë ekspozitë mbi aktivitetet e punës së të burgosurve në qendrat e paraburgimit, si dhe aktivitetet e tjera të cilat ndërmerren nëpër institucionet korrektuese. Shërbimi Korrektues i Kosovës është jashtëzakonisht i përkushtuar në ofrimin e programeve dhe aktiviteteve të ndryshme për të gjithë të burgosurit në institucionet korrektuese dhe qendrat e paraburgimit”, ka thënë Fekaj.