Kryetari i Lëvizjes Vetëvendosje, njëherit kandidat për kryeministër, Albin Kurti ka pritur në takim ambasadoren e Kroacisë në Kosovë, Daniela Barishiq dhe sekretarin e Parë të Ambasadës së Kroacisë, Zlatko Vnuçec, të cilët i njoftoi për procesin e negociatave me LDK për formimin e koalicionit qeverisës.
Ai tregoi se programi i Qeverisë së ardhshme të Kosovës është në fazën e përmbylljes, me ç’rast po përfundon suksesshëm edhe procesi negociator, nga i cili do të rezultojë një qeveri e ndryshimeve progresive.
“Qeveria e re për prioritet do të ketë ngritjen e mirëqenies së qytetarëve dhe luftimin e krimit dhe korrupsionit brenda dhe jashtë institucioneve”, tha Kurti.
Ndërsa, ambasadorja Barishiq tha se Kroacia si kryesuese e Presidencës së BE-së në gjashtëmujorin e parë 2020 do të angazhohet për procesin e integrimit të vendeve të rajonit në këtë institucion. Të dyja palët u pajtuan që emigrimi i qytetarëve të shteteve të Ballkanit, veçanërisht i të rinjve, drejt vendeve të zhvilluara të Evropës, paraqet një problem të madh për rajonin.
Po ashtu u tha se fenomeni i ikjes së trurit po ulë kapacitetet për zhvillimin ekonomik në vend, pa marrë parasysh a ndodhë kjo në Kroaci, e cila tashmë është anëtare e BE-së, apo në vendet sikurse Kosova, të cilat kanë pasur pak përparim drejt integrimeve evropiane, shkruan RTV 21.
Në takim pati pajtueshmëri se zgjidhja e vetme për tejkalimin e këtij problemi kronik është ngritja e mirëqenies nëpërmjet zhvillimit ekonomik dhe barazia para ligjit nëpërmjet luftimit të krimit dhe korrupsionit.
