Kryeministri në detyrë, Ramush Haradinaj përmes një postimi në rrjetin social Facebook tregoj detajet e mbledhjes së mbajtur sot për miratimin e kursimeve dhe ndarjes së buxhetit të ndara sipas kategorive të shpenzimeve të organizatave buxhetore për vitin 2019.
Ai më tutje përmendi edhe Raportin e Thesarit për të hyrat dhe shpenzimet për vitin 2019 si dhe ka miratuar projektin për rivarrimet e dëshmorëve të kombit në varrezat në Velani kjo e cila duhet të ndodhë para festës së 28 nëntorit gjatë këtij viti.
Postimi i tij i plotë:
“Qeveria e Kosovës në detyrë, ka zhvilluar mbledhjen në të cilën ka miratuar vendime nga fushat e përgjegjësive të saja kushtetuese dhe ligjore.
Duke vepruar sipas kërkesës së Ministrisë së Financave, është miratuar vendimi për kursimet dhe ndarjet buxhetore ndërmjet kategorisë së shpenzimeve të organizatave buxhetore për vitin 2019, në pajtim me nenin 15 të Ligjit për Buxhetin e Republikës së Kosovës për këtë vit. Vendimi është hartuar në bazë të kursimeve të deklaruara nga organizatat buxhetore për mjetet financiare për vitin 2019 dhe ka për qëllim që të ngritë efikasitetin e ekzekutimit të buxhetit në përmbyllje të këtij viti fiskal.
Aprovim ka marrë edhe Raporti i Thesarit për të hyrat dhe shpenzimet për periudhën nëntë mujore të vitit 2019, si dhe kërkesa për ndarjen e mjeteve shtesë për Ekipën e Zhvillimit të Kompaktit, të cilat mundësojnë vazhdimin e angazhimit të ekspertëve për përgatitjen e suksesshme për përfitim të grantit Kompakt të Korporatës së Sfidës së Mijëvjeçarit (MCC). Po sot, është miratuar vendimi për rivarrimin e Dëshmorëve të Kombit, dhe propozim vendimi për rivarrimin e heronjve Afrim Zhitia, Fahri dhe Bahri Fazliu, si dhe Agron Rrahmani, në varrezat e Dëshmorëve të Kombit në Velani, para festës së 28 Nëntorit të këtij viti”, thuhet në postimin e kryeministrit në detyrë, Ramush Haradinaj. /InLajmi