Teksa po mundohen t’i harmonizojnë programet e tyre qeverisëse dy partitë që dolën më të votuarat në zgjedhjet e 6 tetorit, LVV-ja dhe LDK-ja, kanë nisur thumbimet ndaj njëra-tjetrës.
Ishte nënkryetari i LDK-së, Lutfi Haziri, ai e cili e filloi “luftën” duke thënë se emri i kryeministrit të ri gjithsesi do të kalojë përmes LDK-së. Analistët vlerësojnë se me deklarata të tilla LDK-ja po mundohet t’ia tregojë muskujt Vetëvendosjes pak para arritjes së koalicionit.
Në prag të arritjes së një marrëveshje koalicioni paszgjedhor dy partitë që dolën si më të votuarat nga zgjedhjet e 6 tetorit, Lëvizja Vetëvendosje dhe Lidhja Demokratike e Kosovës, kanë filluar me deklaratat thumbuese për njëra-tjetrën.
Nënkryetari i LDK-së, Lutfi Haziri, ishte i pari i cili filloi “luftën e thumbimeve”, duke deklaruar publikisht se emri i kryeministrit të ri të vendit gjithsesi se do të kalojë përmes zyrave të partisë së tij. “Është e qartë se emri i kryeministrit kalon nëpër zyrën e LDK-së”, deklaroi Haziri në një postim në rrjetin social “Facebook”.
Madje ai i shtoi se vetëm një parti e vetme në Kosovë nuk mund ta formojë Qeverinë, shkruan gazeta Zëri.
“Tashmë dihet se asnjë parti s’mund ta formojë Qeverinë e vetme, sepse sistemi zgjedhor në Kosovë nuk e mundëson këtë. Ky vend ka nevojë për qeverisje të mirë si për ajër”, ka thënë Haziri.
