Vetëvendosje e LDK dolën parti të para në zgjedhjet e parakohshme të mbajtura më 6 tetor.
10 ditë pas zgjedhjeve, procesi i tërësishëm i numërimit ende nuk ka përfunduar, teksa në bazë të negociatave të zhvilluara deri më tani, janë gjasat e mëdha që opozita e mandatit të kaluar të kalojë në pozitë, shkruan lajmi.net.
Këto dy subjekte pas zgjedhjeve kanë zhvilluar disa takime, por pa rezultate konkrete në formimin e një koalicioni qeverisës. Sidoqoftë, në Lidhjen Demokratike të Kosovës ka pasur zëra nga njerëz të fuqishëm të partisë, që tregojnë haptaz mospajtimet për një koalicion të mundshëm me VV-në.
Agim Veliu e Lutfi Haziri janë të parët të cilët hapën një lloj “lufte mediale” me Vetëvendosjen, me deklarata thumbuese dhe jo në një vijë me kandidaten e tyre për kryeministre, Vjosa Osmanin.
Madje ishte vetë Veliu i cili pak ditë më parë theksonte dallimet në program mes LDK-së dhe Vetëvendosjes.
Veliu do të përkujdesej edhe për deklarata jo fort lëvduese për kandidaten e partisë së tij për kryeministre, Vjosa Osmani.
