Qendra Studentore ofron akomodim në banim dhe ushqim për studentët që vijnë në Universitetin Publik në Prishtinë, me një çmim të volitshëm prej 20 euro banim dhe 15 euro ushqim.
Tash e sa vite kjo qendër ka pranuar 3600 studentë dhe 1500 studentë nga sektori privat vetëm për menzë.
Në vitet e fundit, në kampusin e QS-së, janë ndërtuar edhe tre konvikte të reja të cilat mundësojnë që tani të akomodohen 4000 studentë në konvikt si dhe 2000 studentë të sektorit privat vetëm për shujta ditore.
Pavarësisht faktit që Qendra Studentore arrijnë të akomodoj një numër të madh të studentëve, disa nga ta po arrijnë të keqpërdorin vendin e fituar, duke manipuluar me to, qoftë shitje apo ndërrim vendi me konviktet e tjera.
Çdo vit, Qendra ka probleme me studentë që po tregtojnë me vendin në konvikt si dhe me kartelën e menzës, shkruan inLajmi.
Dy ditë pas shpalljes së rezultateve, në rrjete sociale filloi shitja e vendit dhe kartelës ushqyese nga ana e studentëve, ndërkohë qendra iu bën thirrje që të heqin dorë për manipulimet e tilla.
Megjithatë, duket se studentët nuk po i shqetëson ky fakt, ku edhe në postimin e QS-së, për thirrje që mos të bëhen manipulime, studentët komentojnë për shit-blerje.
Shit-blerja studentore ndodh çdo vit regjistrimi në Qendrën Studentore, InLajmi u sjell disa fakte të këtyre manipulimeve ndër vite.
Megjithatë, disa prej tyre duket se nuk janë në dijeni për akomodimin në konvikt duke pyetur për numrin e dhomave dhe mobilimin.
Shumica prej tyre paraqiten me emra të rremë dhe QS po ka vështirësi t’i identifikojë ata.
Shyhrete Abdullahu nga Qendra Studentore në një prononcim për InLajmi, është shprehur e shqetësuar për shit-blerjen që po bëhet në QS.
“Qendra e Studentëve ka hasur në disa raste të studentëve të cilët përmes rrjeteve sociale kanë deklaruar shitjen e vendeve dhe kartelave të mensës”, thotë Abdullahu për InLajmi.
Ajo, gjithashtu ka treguar se kanë pasur raste kur kanë ndërmarr masa ndëshkuese për keqpërdorime si dhe paralajmëron studentët për ndëshkimet që mund t’iu pasohen në raste të tilla.
“Ndaj këtyre rasteve janë ndërmarr masa ndëshkuese konform rregullores së Qendrës së Studenteve: i’u është marr e drejta e vendeve që kanë fituar në konvikte dhe mensë, emrat e tyre janë vendos në listë të zezë të QS-së, si dhe këta persona nuk gëzojnë më të drejtë aplikimi. Ne edhe më parë ju kemi bërë thirrje studentëve, që të heqin dorë nga keqpërdorimet-manipulimet për shitje dhe blerje të vendeve dhe kartelave, sepse do të merren masa ndaj këtyre rasteve” ka thënë Shyhrete Abdullahu nga zyra për informim e QS-së.
InLajmi, ka arritur të identifikojë disa persona që bëjnë manipulime, por ata nuk kanë pranuar të prononcohen për shkak të frikës së masave ndëshkuese.
Qendra, përveç që ka rritur numrin e objekteve ka investuar edhe në konviktet paraprake, duke bërë ndërrimin e shtretërve, karrigeve dhe disa ndryshime sanitare, me qëllimin që të ofrojë kushte sa më të mira për jetesë studenteve të rinj.
Qendra Studentore ka gjithsej tetë konvikte, ndërkaq pranon 60 përqind vajza, kurse 40 përqind djem.
Kjo qendër ka disa kritere të pranimit, siç janë largësia me qytetin e Prishtinës, mesatarja shkollore, si dhe ofron pikë bonus për studentët e vitit të parë bachelor.
QS, gjithashtu liron nga pagesa studentët që janë fëmijë të dëshmorëve, fëmijët e të pagjeturëve si dhe fëmijët me kategori sociale.
Këto ditë të gjitha konviktet janë hapur për studentët e pranuar, dhe po bëhet akomodimi i tyre në vende përkatëse.
