Së fundmi, gazeta amerikane The Washington Post ka publikuar një artikull, ku thuhet se faqja në Facebook e quajtur “Veteranët për Trump-in”, ku ish-zyrtarët e shërbimeve ushtarake, kanë këshilluar dhe debatuar me presidentin amerikan, Donald Trump nga muajin mars i këtij viti, është “kidnapuar nga një biznesmen në Maqedoninë e Veriut”.
Në gazetën The Washington Post theksohet se në kidnapimin e faqes “Veteranët për Trump-in”, është përfshirë Pande Arsov, i cili është vëllai i avokatit nga Velesi, Trajçe Arsov, për të cilin, IRL dhe partnerët e projektit për raportin për krim të organizuar dhe korrupsion si dhe “Buzzfeed”, raportuan se ai është pronari i vërtetë i kësaj faqeje.
Por, avokati Trajçe Arsov, për Radion Evropa e Lirë, thotë se vëllai i tij, Pande Arsov faqen “Veteranët për Trump-in”, e ka blerë për arsye ekonomike dhe në asnjë mënyrë nuk e ka hakuar këtë faqe.
“Nuk është e vërtetë se unë e kam hakuar faqen në Facebook ‘Veteranët për Trump-in’. Jo vetëm që nuk e kam hakuar, por unë personalisht nuk kam të bëj asgjë me këtë faqe. Përkatësisht, këtë faqe, vëllai im e ka blerë në rrugë ligjore në qershor të vitit 2019”, tha avokati Trajçe Arsov, shkruan REL.
“Në rrugë ligjore ai e ka blerë faqen në fjalë. Në momentin e blerjes, shitësi është legjitimuar si pronar dhe kjo është verifikuar në shqyrtim me administratorët e faqes ‘Veteranët për Trump-in’”, thotë ai, duke sqaruar se kjo faqe ka qenë në pronësi të vëllait të tij vetëm për dy muaj, pasi kompania Facebook, në fund të muajit gusht, faqen “Veteranët për Trump-in” ua ktheu në pronësi krijuesve të vërtetë, transmeton insajderi.
The Washington Post njëherësh kujton se qytetarët e Velesit u bën të njohur në zgjedhjet presidenciale amerikane në vitin 2016 – për çka kishte hetim lidhur me ndikimin e mundshëm gjatë fushatës zgjedhore – pas dyshimeve se nga Velesi është bërë fushatë për ta ndihmuar Trumpin të fitojë zgjedhjet presidenciale, duke përhapur lajme të rreme për kundërshtarët e tij dhe për propagandë që thuhej se ishte në linjë me politikat e Trumpit.
Institucionet Maqedonisë së Veriut janë zotuar se përmes transparencës do të luftojnë lajmet e rreme.
