“Ti je tradhtar”,”Ti je matrapaz”, “Ti je mashtrues”, “Si i smut po dukesh”, “Ti je servil”, “Ti je i padijshëm”, “Jeta tka shku tu ngjy”, “Ty as gruja jote nuk të sheh në ëndërr”, janë vetëm disa prej shprehjeve të ashpëra që janë përdorur ditëve të fundit në debate televizive.
Nga politikanët janë përdorur epitete, të cilat po të përdoreshin nga njerëzit që nuk merren me politikë, në jetën e tyre të përditshme, do të kishin përbërë fyerje të rënda.
Gjuhën e politikanëve si të ashpër e cilëson dhe e kritikon edhe profesori universitar e analisti politik, Milazim Krasniqi.
Krasniqi tha se ka mungesë të programeve dhe të platformave të qarta të cilat do ti ofroheshin publikut dhe se një pjesë e politikanëve janë të konsumuar në skenën politike, andaj si mënyrë mbijetesë kanë zgjedhur këtë gjuhë të ashpër që të luajnë rolin e të fortit, gjë kjo që është shenjë e krizës që i karakterizon një pjesë të elitës politike në vend.
“Mesazhi që transmetohet te publiku përmes kësaj mënyre të komunikimit është jashtëzakonisht i keq, sepse edhe ashtu gjendja psikologjike e një pjese të madhe të qytetarve është shumë depresive, gjë kjo që shihet me prirjen e të rinjëve për të ikur nga Kosova. Madje kjo gjuhë e politikaneve vetëm sa e stimulon këtë gjendje te rënduar psikologjike dhe me njëfarë forme jep mesazh se nuk ka prespektivë për një të ardhme në vend”, u shpreh Krasniqi.
Ai tutje shtoi se pasojat e kësaj forme të komunikimit mund te jenë të rënda sepse shkaktojnë një lloj demobilizimi dhe demotivimi tek qytetarët për të jetuar dhe për të punuar ne Kosovë.
Madje Krasniqi tha se qytetarët do të duhet t’i dënojnë këta politikanë që përdorin këtë lloj komunimi duke mos i votuar ata, sepse parlamentit i duhen deputetë që dijnë të bëjnë ligje, i duhen njerëz intelektual, por fillimisht i duhen qytetarë që janë shembull për të mirë.
Kurse, për dallim nga Milazim Krasniqi, analisti Rrahman Paçarizi mendon se gjuha e politikanëve e përdorur në debate televizive është brenda kornizave të lejueshme përveç rastit sporadik, ndërmjet një përfaqësuesi të LVV dhe kolegut të tij nga PSD.
“Gjuha e ashpër besoj se ndodh kryesisht për shkak të animoziteteve personale ndërmjet pjesemarrësve në debate si dhe për mungesë programesh të qarta dhe konkrete, mungesë që synohet të kompensohet përmes zhurmës e gjuhës denigruese. E keqja e një gjuhe të tillë nga politikanët është mundësia e bartjes së saj te militantët partiakë dhe devalvimi i mëtejshem i garës politike në konflikte të natyrave të tjera”, u shpreh Paçarizi.
Armend Muja, njohës i çështjeve evropiane dhe analistë politik, për InLajmin rreth kësaj çështje tha se gjuha në debate politike do të ashpersohet së tepermi në javën e fundit.
“ Perfaqesuesit politik ende shihen si rol model dhe sjellja dhe gjuha e tyre kopjohet nga të tjerët. Tensionet politike përcjellen me tensione shoqerore”, tha Muja.
Ndërsa, organizata jo qeveritare “Demokracia në Veprim”, përmes një postimi në web faqen e saj ka reaguar kundër gjuhës denigruse në debate televizive.
“Gjuha denigruese dhe seksiste e shpërfaqur në debate televizive në mes të kandidatëve, përveç që dëmton rëndë procesin zgjedhor, e minon vlerën e debatit dhe i kontribuon tensionimit të ambientit politik. DnV-ja u bën thirrje kandidatëve të subjekteve politike që garojnë në zgjedhjet e 6 tetorit, të përmbahen nga gjuha denigruese e seksiste, sulmet verbale dhe fizike. Subjektet politike dhe kandidatët e tyre duhet të kultivojnë vlerat bazike të demokracisë duke treguar pjekuri dhe profesionalizëm në debate dhe duke lejuar konkurrueshmëri të ideve dhe platformave”, thuhet në këtë postim të DnV-së.
Zgjedhjet e parakohshme parlamentare në vend do të mbahen me 6 tetor , dhe atëherë do të dihet ndëshkimi apo përkrahja e qytetarëve ndaj tyre dhe shprehjeve të tyre./InLajmi/
