Sot Kuvendi i Republikës së Kosovës shënon Ditën e Demokracisë. Kryetari në largim i Kuvendit të Kosovës Kadri Veseli përmes rrjetit social Facebook ka thënë se është një ditë e shenjtë për popullin tonë, përcjell InLajmi.
‘Sot është Dita e Demokracisë, një ditë e shenjtë për popullin tonë, i cili ka bërë një rrugëtim të mundimshëm për të arritur deri këtu. Ne e njohim mirë vlerën e demokracisë, sepse e dimë se çfarë do të thotë të jetosh pa të.
Falë partneritetit me SHBA-të dhe BE-në, Kosova ka ecur shumë para në ndërtimin e institucioneve demokratike. Mirëpo ende ngelet shumë për të bërë dhe kërcënimi kryesor që i kanoset demokracisë është korrupsioni.
Unë kam bindje të plotë se klasa jonë politike duhet të ketë kurajo për ta përballur këtë fenomen me nisma konkrete, prandaj kam propozuar një plan gjithëpërfshirës për ta çrrënjosur korrupsionin. Pjesë thelbësore e këtij plani është forcimi i pjesëmarrjes së qytetarëve në luftën kundër korrupsionit. Përmes tij do u garantoj qytetarëve më shumë transparencë dhe më shumë fuqi që të kërkojnë llogari dhe të vënë para përgjegjësisë zyrtarët e korruptuar.
Shpërndajeni këtë postim për të festuar Ditën e Demokracisë!’ ka shkruar Veseli /InLajmi/
