Mënyrat e sjelljes me kolegët dhe me shefin ndryshojnë shumë nga njëra-tjetra, sepse të parët janë si ti, ndërsa i dyti të ka në dorë
Po si duhet të sillemi atëherë me shefin? A duhet të sakrifikojmë edhe në emër të dinjitetit tonë kur na fyejnë?
Në fakt është një çështje shumë delikate, pasi që me lindjen e marrëdhënieve të punës, kanë lindur dhe problemet e ndryshme. Secilit prej nesh mund t’i ketë rastisur që të përballet me probleme të natyrave nga më të ndryshmet në punë, madje edhe të jetë ndier i fyer, por ka kuptuar që prapë nuk ka zgjidhur gjë. Edhe pse nuk është e pranueshme, një shef nuk duhet t’i nënvlerësojë punonjësit, pasi nëse ata nuk kanë kualifikimin e duhur, atëherë është më mirë që t’i largojë nga puna, se sa t’i fyejë.
Po deri në ç’nivel duhet të durohet një shef?
Në stereotipin tonë është e fiksuar se shefi zakonisht kapet me më të dobëtin, sepse e di që ai s’do t’i përgjigjet dhe kështu, në njëfarë mënyre, e bën atë “kokë turku” ku të marrin mësim të tjerët. Por, kjo nuk është e drejtë, pasi një shef i cili ka objektiv të përmirësojë rezultatet e punës, sigurisht nuk i ofendon nëpunësit, po përpiqet t’i frymëzojë e t’u japë zgjidhje problemeve. Secili nga ne ka dinjitetin dhe krenarinë e tij dhe padyshim, askush nuk ka dëshirë t’i cenohet, prandaj dhe ikjet demonstrative nga puna nuk janë të pakta.
Deri tani folëm për shefin, pa e kthyer ende shigjetën nga ana tjetër. Po sikur shefi të mos gabojë në disa momente? Po në rast se ai kritikon me të drejtë?
Edhe pse kritika nuk i pëlqen askujt, secili duhet ta kuptojë që puna ka përgjegjësitë e veta. Prandaj është mirë që të analizojmë veten dhe nëse shefi ka të drejtë, duhet të pranohen kritikat dhe të bëhet vetëkorrigjimi. Nëse nuk ka të drejtë, çështja duhet sqaruar. Nëse bëhet tepër denigrues, atëherë duhen peshuar gjërat. Por, nëse keni nevojë për atë punë, ulni kokën dhe bëhuni diplomat, nëse jo, mos e lejoni që t’ju shkelë.
Për femrat ka edhe specifika të tjera, sepse ka të bëjë shumë se si reagon për momentin. Po qe se ajo e pëlqen shefin, atëherë e di vetë si vepron, nëse i intereson vetëm puna, atëherë zbaton rregullat e mësipërme.
Po me kolegët në punë…
Për të pasur marrëdhënie të mirë me kolegët, duhet të shohim anën pozitive dhe të sillemi sa më mirë, duke thënë “po” çdo herë që të jetë e mundur?
Për t’u ndier mirë me të tjerët në punë nuk mjafton vetëm të kemi një komunikim të mirë, por të kemi edhe dashuri, bashkëpunim, në mënyrë që të kemi rendiment. Kështu rezulton nga disa studime. Po çfarë ndodh në momentin kur këto marrëdhënie janë më tepër se ç’duhet të ngushta? Çfarë ndodh kur brenda zyrës lind një dashuri? A e rrit kjo rendimentin në punë?
Paragjykimet e këtyre fenomeneve që ndodhin në punë i hedhin poshtë shumë sondazhe. Ata tregojnë se shumë çifte janë njohur dhe martuar në vendet e punës. Zakonisht, pjesa më e madhe e njerëzve mbron idenë se të kesh një histori në zyrë, të jep më shumë lumturi dhe energji dhe kështu, të bën ta duash më shumë punën që bën. Njerëzit që lidhen me kolegët e tyre i njohin mirë ndjenjat e tyre dhe kjo prodhon më shumë energji dhe kapacitet pune. Ky efekt favorizon dhe një sjellje më profesionale dhe zhduk mundësinë e krijimit të problemeve me shefin, apo me kolegë të tjerë.
Por si e mendon një burrë apo një grua këtë fenomen?
Burrat, në përgjithësi, sidomos ata që bëjnë pjesë në shkallën e lartë të hierarkisë, e mohojnë faktin që dashuria brenda zyrës është një mjet që tregon fuqi. Ky mund të jetë një lajm i keq për ato gra që kanë një status social më të ulët dhe kanë rënë në “grackën” e dashurisë me këta burra. Kjo padyshim sjell pasoja, pasi marrëdhëniet me shefin apo me kolegët janë zakonisht problemet kryesore që hasen në ambientin e punës. Megjithatë fenomene të tilla herë ulin dhe herë rrisin rendimentin në punë, pasi shtrohet pyetja se çfarë do të ndodhte nëse lidhja do të mbaronte në mënyrë të dhimbshme? Ku do të ishte rendimenti?
Në fakt, kjo duhet menduar mirë dhe padyshim lë vend për debat, pasi nëse lidhja do të mbaronte në mënyrë të dhimbshme, atëherë do sillte pasoja katastrofike në planin personal dhe profesional, duke influencuar negativisht jo vetëm rendimentin në punë, por edhe raportet me kolegët e tjerë. /InLajmi/