Sot është mbajtur protesta kundër mbylljes së nëntëmbëdhjetë shkollave në Komunën e Kamenicës, e paralajmëruar nga Sindikate e Bashkuar e Arsimit në Kosovë (SBASHK).
Qëllimi i kësaj proteste ishte tërheqja e vendimit të kryetarit të komunës së Kamenicës, Qëndron Katrati, lidhur me mbylljen e shkollave.
Kryetari i SBASHK-ut, Rrahman Jashari tha për InLajmin se protesta e sotme ishte e qetë dhe kishte një numër më të madh të pjesëmarrësve se sa është pritur. Ai tha se përkrahës të mësimdhënësve ishin kolegët nga të gjitha shkollat e Kamenicës, kryetari i Sindikatave të Arsimit Fillorë dhe të Mesëm në Kamenicë, Nazim Jakupi po ashtu edhe kryetari i BSPK-së, Avni Hajdini.
Jashari shtoi se përmes kësaj proteste i është bërë thirrje Kryetarit të Komunës, Qëndron Kastrati që ta tërheq vendimin dhe mos ta acaroj më shumë situatën.
”Presim që kryetari Kastrati ta tërheq vendimin dhe të mos krijoj trazira në situata të tilla, të paktën për këtë vit kur jemi në prag të zgjedhjeve, të krijohen institucionet e reja dhe të vendosët njëjtë për të gjithë në nivel vendi”, tha Jashari.
Jashari po ashtu tha se Kastrati duhet t’i lë të qetë punëtorët e arsimit në të gjitha shkollat, sepse nuk është koha e mbylljes së tyre, sidomos në këto vise malore ku fëmijët e kanë shumë të vështirë të udhëtojnë deri në Kamenicë sidomos në stinën e dimrit.
I pyetur në atë se a kanë tentuar të bisedojnë pas protestës me të parin e komunës së Kamenicës, Jashari tha për InLajmin, se do të bisedojnë, vetëm në çoftë se e pranon kushtin që i kanë vendosur.
“Për tu ulur të bisedojmë ai duhet të bëjë hapin e parë ta tërheq vendimin e pastaj të arrijmë një marrëveshje dhe po ashtu duhet të bëjë shpërndarjen e librave dhe ditarëve sepse nuk ka të drejtë t’i ndaloj”, tha ai.
Lidhur me këtë çështje InLajmi, ka kontaktuar edhe drejtoreshën e Arsimit në Komunën e Kamenicës, Mirihane Morina e cila ka thënë se arsyeja e mbylljes së shkollave është numri i vogël i nxënësve.
“Rënia e numrit të nxënësve është arsyeja që ne e kemi vendosur t’i mbyllim këto shkolla, klasat me pak nxënës i pamundësojnë fëmijëve të jenë të aftë për jetë”, tha Morina.
Drejtoresha po ashtu shtoi se prindërit dhe SBASHK-u janë të ndikuar nga grupet e ndryshme politike dhe se po bëjnë fushatë të ndyrë politike me nxënës.
“Prindërit janë të ndikuar nga grupet e ndryshme të interesit, SBASHK-u po bënë fushatë të ndyrë politike, duke i përdorur nxënësit dhe mësimdhënësit në këtë situatë të ndjeshme”,tha ndër të tjera drejtoresha për InLajmin.
Moria tha se nuk do të tërhiqet vendimi i Komunës së Kamenicës dhe se SBASHK-u nuk ka kompetenca të dal në protestë dhe se qëllimet e tyre janë politike, sidomos në këtë kohë të zgjedhjeve.
“Prej vendimit nuk ka mundësi me u tërheq, SBASHK-u nuk ka kompetenca të dal në protestë për me u hapë shkollat apo me u mbyllë, ata thjeshtë janë duke bërë fushatë politike”, shtoi Morina.
Drejtoresha ndër të tjera tha se nxënësit po i presin librat në shkollat e Kamenicës dhe se transporti do të iu sigurohet nga komuna.
Ndryshe, vendim është marrë që në muajin shtator të mbyllen 19 shkolla në Kamenicë, sipas kreut të kësaj komune Qëndron Kastrati arsyeja e mbylljes është gjendja e keqe në të cilën ndodhen ato dhe numri i vogël i nxënësve.
Këtë vendim kryetari i komunës e kishte arsyetuar edhe përmes një postim në Facebook me datën 30 gusht 2019.Gentiana Mani, /InLajmi/
