Kandidatja për kryeministre e LDK-së, Vjosa Osmani ka thënë se në zgjedhjet e 6 tetorit do të ketë mbështetje nga të gjithë nënkryetarët e partisë.
Vjosa Osmani, e ftuar në emisionin “Debat Plus” me Ermal Pandurin në TV Dukagjini ka thënë se rënia e votës për LDK-në në vitet e kaluara ka të bëj me koalicionin që kjo e fundit pati bërë me PDK-në
Ajo thotë se njerëzit e LDK-së në zona të caktuar kanë punuar mjaft dhe rezultati i atyre zgjedhjeve nuk ka pasur të bëj me pakënaqësitë e brendshme brenda partisë.
Kandidatja për kryeministre nga LDK-ja, ka thënë se në këto zgjedhje do ta ketë mbështetjen e plotë të Lutfi Hazirit dhe nënkryetarëve të tjerë.
“Do të kemi një rritje shumë të madhe të votës në Gjilan që do t’i befasojë të gjithë. Puna jonë nuk mund të shihet si vetëm bashkëpunim mes Lutfi Hazirit dhe Vjosa Osmanit, por bashkëpunim i një grupi të madh duke filluar nga kryetari. Vota e LDK-së në Gjilan do të jetë më e madhja që nga koha e Presidentit Rugova”.
Osmani ka mbrojtur edhe Qeverinë Mustafa duke thënë se ajo qeveri nuk ka pasur asnjë ministër me aktakuzë për dallim siç thotë ajo nga qeveria në detyrë. /InLajmi/
