Gjykata Themelore në Prizren, ka marrë vendim që shteti kosovar t’ia paguajë 95 mijë euro familjes së Diana Kastratit, pasi që Gjykata Themelore në Prishtinë, e kishte neglizhuar rastin e vajzës së tyre.
Këtë e bëri të ditur ish-deputeti Korab Sejdiu, i cili së bashku me kompaninë e tij, kishte qenë avokat i familjes Kastrati.
Në njoftimin e Shoqëria e Avokatëve “Sejdiu & Qerkini” SHPK, thuhet se ky rast është vazhdimësi e rastit të mirënjohur që familja Kastrati e fitoi kundër Republikës së Kosovës në Gjykatën Kushtetuese.
“Sot mora lajmin se Gjykata Themelore në Prizren ka detyruar Republikën e Kosovës që ta kompenzojë dëmin prej €95,000.00 që Gjykata Themelore në Prishtinë i ka shkaktuar atyre duke neglizhuar rastin e vajzës së tyre të ndjerë, rrjedhimisht duke i shkelur asaj të drejtën në jetë.
Diana Kastrati ishte vrarë nga bashkëshorti i saj në vitin 2011. Ajo u vra edhe pse disa herë radhazi kishte raportuar në organet e sigurisë në Kosovë, për rrezikun që i kanosej nga bashkëshorti i saj.
“Fitore shumë e madhe për viktimat e dhunës në familje. Faleminderit Familja Kastrati për insistimin qe drejtësia të triumfojë!”, ka shkruar Sejdiu në Facebook.
Diana Kastrati, 27 vjeçarja nga Prishtina, kishte kërkuar mbrojtje 24 orëshe nga policia e Kosovës dhe organet e drejtësisë, pas kërcënimeve me vrasje nga ish-bashkëshortit, Adnan Jashari, i cili është i dyshuar për vrasjen e saj para shtëpisë në vitin 2011.
Pavarësisht kërkesës që kishte bërë ajo, Gjykata Komunale në atë kohë, që kishte qenë e obliguar me ligjin për mbrojtje nga dhuna në familje, t`i sigurojë mbrojtje emergjente që nga momenti i paraqitjes, nuk i ishte përgjigjur fare, shkruan Insajderi.
Për këtë ishte gjetur fajtor gjykatësi Enver Shabanaj, pas ankesës së prindërve të Dianës, Gëzim dhe Makfire Kastrati, të cilët patën dorëzuar në Gjykatën Kushtetuese një mocion kundër institucioneve që nuk vepruan.
