Gjykata Themelore në Pejë, i aprovoi kërkesën e Prokurorisë Themelore për caktimin e masës së paraburgimit ndaj të pandehurit R.A i cili akuzohet se nuk i ofroi ndihmën e nevojshme viktimës femër dhe e la të vdiste në trotuar.
Sipas një njoftimi të mediave dyshohet se me datën 24.08.2019 , në ora 12:20, në Pejë nuk i është ofruar ndihmë personit, jeta e të cilit ndodhej në rrezik të drejtpërdrejtë.
Kjo ndihmë nuk përbënte rrezik për askënd.
“I pandehuri R.A ishte takuar me viktimën për të pirë kafe, me të cilën kishte bashkëjetuar për tre muaj në fillim të vitit 2019, të njëjtën e kishte marrë me veturë dhe derisa asaj i ishte përkeqësuar gjendja shëndetësore në veturën e tij, ai e ndal veturën në një trotuar dhe ik nga aty duke mos i dhënë ndihmën e nevojshme e ndërkohë viktima gjendet e vdekur në atë vend”, thuhet në njoftim.
“Këto veprime të pandehurin e bëjnë dyshues se ka kryer veprën penale mosdhënia e ndihmës. Të pandehurit R.A i është caktuar masa e paraburgimit në kohëzgjatje prej një (1) muaji”, thuhet në njoftimin e gjykatës./Insajderi
