Myftiu i Republikës së Kosovës Naim Tërnava, iu drejtua besimtarëve myslimanë me një mesazh në xhumanë e fundit të muajit Ramazan, shkruan InLajmi.
Ai theksoi se ky Ramazan na privoi të gjithëve nga xhamitë tona për shkak të situatës pandemike, por që qëllimi i vetëm ishte ruajtja e shëndetit publik, derisa adhurimet ndaj Krijuesit secili ka mundur t’i kryej në shtëpitë e tyre.
Myftiu foli poashtu për debatet e zhvilluara rreth çështjes së hapjes së xhamive, duke ritheksuar se Bashkësia Islame e Kosovës ka qenë në kontakt të vazhdueshëm me institucionet shëndetësore, poashtu edhe me njohës të së drejtës së sheriatit.
Nga këto kontakte e takime u vlerësua se rreziku ekziston, andaj duhet të presim edhe një kohë për rihapjen e tyre, në mënyrë që të mos rrezikohen jetërat e shumë njerëzve.
Myftiu Tërnava tha se me dispozitat e fesë Islame, jemi të obliguar që të respektojmë institucionet përgjegjëse, të respektojmë ekspertët dhe të ruajmë vetën e njëri-tjetrin.
Në këto kushte tha myftiu, besimtarët janë të obliguar ta presin festën e Fiter Bajramit në shtëpitë e tyre bashkë me familjen, pa i lënë anash lutjet, ibadetet dhe festën duke respektuar masat e profesionalistëve.
Ai në fund uroj që Zoti ti ketë pranuar ibadetet e lutjet në muajin Ramazan, ta ruaj shëndetin, jetën dhe vendin tonë./InLajmi/
