Kryeministri në detyrë, Albin Kurti, së bashku me Ministrin e Bujqësisë Besian Mustafa, ka shkuar për të parë nga afër dëmet që janë bërë nga reshjet e fundit në Mamushë, vend që ndihmon shumë në prodhimin vendor të kulturave bujqësore.
Ai tha se kjo fatkeqësi që goditi në fatkeqësinë e pandemisë nuk mbahet mend as nga më të vjetrit.
“Biseduam me një plak 70 vjeçar që tha se kurrë në jetën e tij s’ka parë kaq grumbuj akuj të rënë. Kjo është një fatkeqësi që nuk e mban mend as brezi. Askush që është i gjallë nuk e mban mend të ketë ndodhë në të kaluarën reshje me copa ta akullit që janë edhe më të mëdha se veza e pulës”.
Kurti si në Suharekë edhe në Mamushë u zotua për kompensimin e dëmeve nga shteti.
“Po e shohim vetë dëmin e madh që e kanë shkaktuar akulli i rrufesë që është i paparë në këtë anë për shumë dekada. Gjithë këtij rajoni ne duhet t’i ndihmojmë derisa ata kontribuojnë shumë në prodhimin vendor dhe në buxhetin e shtetit. Prandaj jemi këtu me ministrin Mustafa që të tregojmë se ne kuadër të pandemisë kemi edhe një fatkeqësi shtesë. Shteti duhet ta dëshmojë veten në këtë kohë”.
“Ekziston edhe buxheti i ndarë për Ministrinë e Bujqësisë në Pakon Emergjente dhe duhet bërë evidentimi i dëmeve bashkë me një komision dhe më pas të bëhet edhe vlerësimi i tyre që të ndodhë kompensimi i drejtpërdrejtë. Kur sheh një veprimtari kaq të madhe natyrisht që shteti e Qeveria do të duhej t’i ndihmojë këta njerëz kaq punëtorë e kontribues edhe kur s’ka fatkeqësi e lëre më tash”, transmeton Klan Kosova.
Ndërsa, Ministri i Bujqësisë, Besian Mustafa, tha se shpejt do të bëjnë verifikimin e dëmeve përmes një komisioni të krijuar bashkë me komunat dhe më pas të bëhet edhe kompensimi.
