Koordinatori për bashkëpunim me Qendrën Evropiane për Kontrollin dhe Parandalimin e Sëmundjeve, mikrobiologu Lul Raka, ka folur rreth koronavirusit të ri në Kosovë, si pasojë e të cilit deri më tash 33 janë infektuar dhe një person ka vdekur.
Ai ka shprehur shqetësimin për hyrjen ‘në të zezë’ të personave që hyjnë në Kosovë nga vendet e prekura.
“Kush vjen në Kosovë nga jashtë duhet të hyjë në karantinë. Rregulla e distancës vlen edhe në karantinë dhe duhet të respektohen”, është shprehur Raka.
Ai ka treguar për rastet e para të infektimit në Kosovë, sikurse ai në Viti, kur banori i prekur me koronavirus ka infektuar të gjithë anëtarët e familjes, derisa ka shtuar se në një rast të ngjashëm në SHBA, kur një çift kishte pasur kontakte me 342 persona të tjerë, asnjëri prej këtyre të fundit nuk kishte dalë pozitiv.
“Këtu nuk ka matematikë të saktë. Ka shumë të panjohura të virusit. Është edhe shkallë e infeksionit, patogjeni, potenciali që të përhapet te personi, nuk ka sqarime pse më pak preken të rinjtë. Nuk dihet infeksioni te fëmijët, te njerëzit e grupeve në zona të izoluara dhe ka shumë të panjohura që duhet sqaruar”, tha Raka në RTV Dukagjini.
Raka thotë se sa më shpejt që të intervenohet në këtë fazë, aq më mirë do të jetë.
Sipas tij, shërimi i të prekurve me koronavirus varet nga gjendja e tyre klinike dhe se shërimi ndodh pas dy javësh, derisa te pacientët e rëndë e kalojnë periudhën gjashtë-javore dhe që mund të ketë edhe përfundim fatal.
