Kryeministri Albin Kurti, tha se gjykatat t’i trajtojnë më prioritet rastet e viktimave të luftës.
Kurti në seancën e veçantë me rastin e Ditës së Gruas, kushtuar ngritjes së vetëdijes së shoqërisë për të mbijetuarat e dhunës seksuale gjatë luftës së fundit në Kosovë, shtoi se Qeveria është e gatshëm që t’i rrisë kapacitetet e prokurorive.
“Turpi nuk u përket atyre që u përdhunuan por na përket të gjithë neve tjerëve, Zonja Krasniqi mirë se erdhe në shtëpinë tënde. 22 vjet kanë kaluar, unë dje mora pjesë në dy marshe publike për të drejtat e grave dhe bëmë homazhe në kompleksin memorial. Sot jemi këtu për të folur por një çështje që është e ndjeshme, 22 vjet kanë kaluar dhe plagët u luftës ende janë të hapura. Për frontin që na ka hapur plagë më tepër e që duam të kemi vëmendjen tuaj janë grat dhe burrat e përdhunuar që edhe sot vazhdojnë me plagë, ne nuk mundemi ta imagjinojmë tmerrin që kanë përjetuar por edhe vuajtjet që kanë kaluar pas luftës”, ka thënë Kurti.
“22 vite kanë kaluar dhe plagët e luftës ende janë të hapura. Kemi ende perona të zhdukur dhe shumë borxhe të papaguara. Ne nuk mundemi as të imagjinojmë vuajtjet e tyre, por edhe vuajtjet duke jetuar me këtë drojë”.
“Sot si kryeministër e kam për detyrë që të veproj që kriminelët të dalin para drejtësisë dhe kjo vonesë kaq e madhe është e dëmshme. Me kalimin e shumë viteve, dëshmitarët dhe kriminelët vdesin duke pamundësuar ata që të dënohen”.
“Gjykatat tona duhet t’i trajtojnë më prioritet çështjet e viktimave të luftës. Qeveria është e gatshëm që t’i rrisë kapacitetet e prokurorive. Kosova pas 22 viteve nuk kemi asnjë aktgjykim për rastin e përdhunimeve të luftës”.
Kreu i Qeverisë u ka bërë thirrje që kjo kategori të aplikojë për statusin e viktimave të dhunës seksuale gjatë luftës.
“Unë ju bëj thirrje atyre personave që janë të kësaj kategorie të aplikojnë që të marrin statusin e personave të dhunuar. Kjo kategori është e dhimbshme, por e nevojshme për juve. Ky proces ka nisur me vonesë, por më mirë se ka nisur me vonesë sesa mos të niste fare”, u shpreh Kurti.
