Komuna e Ferizajit ka njuoftuar qytetarët se ka filluar procesi i legalizimit të ndërtimeve pa leje, dhe ka ftuar të gjithë qytetarët që t’i nënshtrohen këtij procesi mjaft të rëndësishëm për të siguruar investimin e tyre si dhe harmonizimin me planifikimin urban.
Tutje thuhet se nëse ndërtimi i cili është kryer para vitit 2004, pronari ose investitori i atij objekti lirohet nga taksa, shkruan InLajmi.
Njoftimin e ka bërë përmes rrjetit social Facebook.
Njoftimi i plotë:
Njoftohen qytetarët e Komunës së Ferizajt se ka filluar procesi i legalizimit të ndërtimeve pa leje. Për këtë Drejtoria e Urbanizmit dhe Mjedisit fton të gjithë qytetarët që t’i nënshtrohen këtij procesi mjaft të rëndësishëm për të siguruar investimin e tyre si dhe harmonizimin me planifikimin urban.
Procesit të legalizimit të ndërtimeve pa leje i nënshtrohen këto dy kategori:
Kategoria I (deri në 450 m2 ), kurse taksa komunale është 1 euro për metër katror dhe
Kategoria II (mbi 450m2), kurse taksa komunale është 2 euro për metër katror
Dokumentet e nevojshme:
Për kategorinë e I-rë dhe shtëpitë e kategorisë së II-të, aplikuesi (investitori, pronari) për të aplikuar duhet të bashkëngjis:
- Kopjen e Planit dhe Fletën Poseduese
2. Elaborat gjeodezik
3. Letërnjoftimin kopje
Për kategorinë e II-të, aplikuesi (investitori, pronari) për të aplikuar duhet të bashkëngjis:
- Kopjen e Planit dhe Fletën Poseduese
2. Elaborat gjeodezik
3. Dokumentacioni i kompanisë projektuese
4. Letërnjoftimin kopje
Për informata më të hollësishme, ju lutem të drejtoheni në Drejtorinë e Urbanizmit dhe Mjedisit.
Adresa: Bulevardi “Dëshmorët e Kombit”, Ndërtesa e Re e Komunës, ish objekti i Gjykatës Themelore në Ferizaj, kati përdhese.
*Vërejtje: Nëse ndërtimi i cili është kryer para vitit 2004, pronari ose investitori i atij objekti lirohet nga taksa./InLajmi/
