Presidenti i Federatës Shqiptare të Futbollit, Armand Duka, ka dhënë një intervistë për Euronews Albania, ku ka folur për ndeshjen ndaj Serbisë, emocionet e ekipit Kombëtar, fazën play-off, objektivat për kualifikimin në Kupën e Botës 2026 dhe kombëtaren e Kosovës.
Duka vlerësoi përkushtimin e skuadrës kuqezi, organizimin e ndeshjes në Serbi dhe theksoi se futbolli duhet të mbetet gjithmonë një urë bashkimi mes popujve, pavarësisht rivaliteteve.
Ai u shpreh se ndeshja ndaj Serbisë ishte mjaft e ngarkuar dhe me emocione, pasi ishte një ndeshje e rëndësishme që do të vendoste nëse Shqipëria do të vazhdonte ose jo në fazën play-off të Botërorit.
Përveç rëndësisë sportive, Duka përmendi edhe ngarkesat që sjell një përballje si ajo mes Shqipërisë dhe Serbisë.
Sipas tij, falë organizimit të Federatës Serbe gjithçka shkoi shumë mirë nga pikëpamja organizative, akomodimi, udhëtimi, kushtet e lojës, si dhe për shkak të impenjimit të futbollistëve dhe lojës së tyre, rezultati ishte shumë i bukur dhe kënaqësi për ekipin dhe tifozët.
Duka theksoi gjithashtu se ndeshjet e ekipit Kombëtar janë gjithmonë me më shumë ngarkesë emocionale, dhe se përgatitja dhe përqendrimi i skuadrës ishin në nivele shumë të larta për këtë sfidë.
Ai po ashtu foli për rëndësinë e ndeshjes ndaj Andorrës, nga e cila Shqipëria mund të nxjerr biletën e Playoffit, duke potencuar që duhet ta marrin me shumë seriozitet lojën.
Ai vlerësoi edhe Kosovën për fitoren ndaj Suedisë dhe tha që do të ishte e mrekullueshme po ti kishim dy kombëtaret tona në një botëror.
