Polonia do të rihapë kufirin me Bjellorusinë në mesnatën e së enjtes, pas një mbylljeje gati dy-javore që u vendos më 12 shtator si reagim ndaj ushtrimeve të përbashkëta ushtarake ruso-bjelloruse të njohura si “Zapad 2025”.
Kryeministri Donald Tusk tha se përfundimi i manovrave ushtarake ka reduktuar nivelin e kërcënimeve, edhe pse ato nuk janë eliminuar plotësisht.
“Duke marrë parasysh interesat ekonomike të transportuesve dhe hekurudhave polake, arritëm në përfundimin se kjo masë i ka shërbyer qëllimit të saj”, u shpreh ai.
Mbyllja e kufirit pasoi ndërhyrjen e paprecedentë të dronëve rusë në hapësirën ajrore polake, çka ngriti alarmin te aleatët e NATO-s për rrezikun e përhapjes së luftës nga Ukraina drejt vendeve të tjera të rajonit.
Sipas qeverisë polake, ministri i Brendshëm do të miratojë një rregullore të posaçme për rihapjen e kalimeve rrugore dhe hekurudhore.
Komisioni Evropian ka paralajmëruar javën e kaluar për ndikimin ekonomik që ka pasuar mbyllja, e cila preku një korridor hekurudhor të rëndësishëm tregtar mes BE-së dhe Kinës, me një vlerë të mallrave prej rreth 25 miliardë eurosh në vit.
Javën e kaluar, Komisioni Evropian tha se po monitoronte ndikimin e mundshëm ekonomik të shkaktuar nga mbyllja e kufirit, e cila në fakt ka mbyllur një rrugë tregtare hekurudhore midis bllokut dhe Kinës.
Mbyllja e hekurudhës thuhet se ndikon në një vëllim vjetor prej 25 miliardë eurosh në mallra midis BE-së dhe Kinës.
