Astronauti amerikan Jim Lovell, i njohur për kthimin heroik në Tokë pas shpërthimit në bord gjatë misionit Apollo 13, ka ndërruar jetë në moshën 97-vjeçare, konfirmoi NASA.
Lovell u bë i famshëm në vitin 1970, kur si komandant i Apollo 13 u përball me një situatë të rrezikshme në hapësirë pas një shpërthimi që prishi sistemet kryesore të anijes.
Duke punuar me ekipin në bord dhe me kontrollin e misionit në Tokë, ai udhëhoqi rikthimin e sigurt të ekuipazhit, një nga historitë më frymëzuese të mbijetesës dhe vendosmërisë në historinë e eksplorimit hapësinor.
Deklarata e NASA-s e cilësoi Lovell-in si njeriun që “ktheu një tragjedi të mundshme në një sukses”, ndërsa familja e tij tha se “do të na mungojë optimizmi, humori dhe besimi i tij se çdo e pamundur mund të arrihet”.
Lovell ishte gjithashtu anëtar i misionit Apollo 8 – i pari që orbitonte Hënën – dhe njeriu i parë që shkoi drejt Hënës dy herë pa e shkelur asnjëherë atë. Ndërkohë, fraza e tij e famshme “Hjuston, kemi pasur një problem” mbetet një nga më ikoniket në historinë e NASA-s.
Homazhe për të kanë ardhur nga personalitete të shumta, përfshirë aktorin Tom Hanks – i cili portretizoi Lovell në filmin e njohur “Apollo 13” – i cili e quajti atë “një nga ata njerëz që guxojnë, ëndërrojnë dhe i udhëheqin të tjerët drejt të panjohurës”, trasnmeton T.CH.
Karriera e Lovell nuk nisi në Hollywood, por në një fushë të hapur në Wisconsin, ku si adoleshent 16-vjeçar ndërtoi një raketë me përbërës baruti dhe e lëshoi në ajër, në një eksperiment të rrezikshëm që pothuajse i kushtoi jetën – por që paralajmëroi një të ardhme në eksplorimin hapësinor.
