Deputetja e LDK-së, Hykmete Bajrami, ka paralajmëruar se Kosova mund të përballet me mungesë energjie elektrike, madje edhe gjatë natës,
Ajo tha se pjesa më e madhe e energjisë që përdoret në vend importohet, ndërsa kapacitetet e brendshme janë shumë të ulëta me vetëm dy blloqe funksionale, shkruan Gazeta Sinjali.
“Pjesa më e madhe e energjisë që po shpenzohet në Kosovë po importohet. Nuk e di nëse janë përcjellë të dhënat e shkëmbimeve tregtare të energjisë, por sasia që po e gjeneron Kosova për momentin është jashtëzakonisht e vogël. Aktualisht kemi vetëm dy blloqe funksionale. E patë edhe tymin sot, që ka mbuluar jo vetëm Obiliqin, por edhe krejt Prishtinën. Thuhet se njëri nga blloqet është vënë në funksion pa vendosjen e filtrave, dhe kjo është jashtëzakonisht e rrezikshme. Prandaj, po ju them hapur: ka gjasa që sonte të mos kemi as tym të mjaftueshëm – e lëre më rrymë – gjatë natës”, u shpreh Bajrami.
