Në organizim të mrekullueshëm të ShB “Fidani”, sot në Galerinë e Teatrit të qytetit “Bekim Fehmiu”, në Prizren, para adhuruesve të shumtë të fjalës së shkruar artistike, u bë promovimi i librit me tregime, të autorit dursak Kadri Tarelli.
Nga Osman GORANCI
E bukura e librit “Filxhani me buzë të kafshuara”, është se autori herë si kronist e herë si historian, me penë dhe me një aftësi të vreçantë intelektuale i ka mbledhur dhe zbërthyer nga gurra e pasur e popullit në hapsirën mbarëshqiptare, shumë rrëfime reale, emocionuese, por edhe frymëzuese. Të gjitha këto rrëfime, e histori të shkurtra si dhe vetë përjetimet e veta në kohë dhe nëpër kohë, autori Kadri Tarelli, me një mjeshtri të rrallë, duke i portretizuar me kujdes tiparet dhe karakteret e personazheve që edhe i hasim në jetën e përditshme, i ka përmbledhur në një libër, që tek lexuesit lënë mbresa të thella nga ndodhitë e përjetuara, që për një kohë të gjatë do të mbeten në kujtesën e tyre.
Në këto tregime, gjithsecili i përjetojmë dhe i ndjejmë këmbanat e dashurisë, shpirtin e humanistes tonë të shnjetë Nëna Tereze, trimërinë e Adem jasharit, frymën liridashëse të luftëtarëve të Ushtrisë Çlirimtare të Kosovës, mallin e shqiptaro amerikanit për vendlindje, ullinjtë e Qamiles, etj. Edhe vetë titujt e mbi pesëdhjetë tregimeve në librin, “Filxhani me buzë të kafshuara”; “Nga loti i nënave deti u bë i kripur”, “Dashuri adoleshenti”, “Ndodh rakija të bëhet ujë”, “Kapelja i solli drutë”, “Skëmnderbeu nuk më lë të martohem”, “Me fëmijët e dardanisë”, “Gratë dhe muhabeti te porta”, etj, shtojnë kurreshtjen tek lexuesi, që t’i lexoj me një frymë, dhe t’i rrilexoj edhe njëherë, edhe shumë herë!…
Gjitha këto tregime, ku hasim edhe figura letrare si metamorfoza, sarkazma, etj, janë të shkruar me një gjuhë të pastër letrare, që edhe nuk e lodhin lexuesin, ngase aty hasim në copëza jete, rrëfime dhe histori të shkurtra, ku edhe githsecili mund ta gjejmë veten mes dhe brenda tyre. Poashtu, nisur nga përvoja shumëvjeçare në fushën e arsimit dhe të letrave shqipe, duke iu qasur një mendësie artistike, por edhe filozofike të shkrimit, në mbititujt e shumë tregimeve autori Kadri Tarelli, jep thënie të mendimtarëve të ndritur, jo vetëm nga trojet tona etnike, por nga i gjithë globi.
Për librin “Filxhani me buzë të kafshuara”, që u promovua sot në Prizren, folën Berat Batiu, Prof. Zamire Hereni dhe Ali Balliu, krijues letrar. Ndërsa punëtorja shquar e arsimit në Durrës dhe kritikja e njohur e letërsisë, Merita Kuqi, mes tjerash tha; “ky libër me tregime, që godasin dhe na bëjnë të qeshim, e ku çdo njëri mund ta gjejë veten në të kaluarën dhe të sotmën, është një sihariq si për lexuesin ashtu edhe për letrat shqipe. Këtu autori Tarelli është edhe vetë një nga personazhet e tregimeve që vetë i ka qëndisur me penën e tij magjike”
Kënaqësi të veçantë në këtë promovim libri, ishin këngët dhe zëri i mrekullueshëm i prizrenases Andra Burri./InLajmi/
