Udhëheqësi i Partisë Republikane Popullore (CHP), partisë më të madhe opozitare në Turqi, Özgür Özel, u godit nga një person teksa largohej nga një ceremoni përkujtimore në Qendrën Kulturore Ataturk të Stambollit.
Ngjarja ndodhi gjatë homazheve për Sırrı Süreyya Önder, nënkryetarin e parlamentit që ndërroi jetë të shtunën.
Sulmi u filmua dhe pamjet tregojnë Özelin duke mbajtur kokën me dhimbje. Autori, i identifikuar me inicialet S.T., është një burrë i papunë dhe u ndalua menjëherë nga policia.
Presidenti Recep Tayyip Erdoğan telefonoi personalisht Özelin për të dënuar atë që e quajti “sulm të shëmtuar”. Edhe zëdhënësi i Partisë për Drejtësi dhe Zhvillim (AK Parti), Ömer Çelik, tha se sulmuesi do të përballet me drejtësinë dhe se çdo sulm ndaj institucioneve politike është i papranueshëm.
Özel është një kritik i fortë i qeverisë dhe presidentit Erdoğan. Ai është rizgjedhur kohët e fundit si kryetar i CHP-së dhe shpesh e ka akuzuar qeverinë për shtypje ndaj opozitës, duke e quajtur atë një “administratë junta”.
