Një aksident me fatalitet ka ndodhur në Vushtrri, gjatë transportit të nxënësve nga fshati Duboc, ku si pasojë ka humbur jetën shoferi i kësaj linje H.S. dhe janë lënduar disa nxënës, përcjell InLajmi.
Lajmin e ka bërë të ditur kryetari i kësaj komune, Ferit Idrizi, i cili tha se lajmin për vdekjen e shoferit të autobusit e mori me pikëllim të thellë, ku I shpreh ngushllime familjes të së ndjerit.
Ndërsa sipas Idrizit në këtë aksident janë lënduar edhe disa nxënës, të cilët tashmë janë duke marrë trajtim në Emergjencën e Spitalit “Sheikh Zayed” në Vushtrri.
Postimi i plotë i tij:
TELEGRAM NGUSHËLLIMI
Me pikëllim të thellë mora lajmin për një ngjarje tragjike që ka ndodhur në komunën tonë gjatë paradites së sotme.
Në një aksident që ka ndodhur gjatë transportit të nxënësve nga fshati Duboc, komuna jonë ka humbur një burrë të ndershëm e një qytetar të përgjegjshëm, shoferin e kësaj linje, Hajzer Sadiku, ndërsa janë lënduar edhe disa nxënës, të cilët tashmë janë duke marrë trajtim në Emergjencën e Spitalit “Sheikh Zayed” në Vushtrri.
Në emër të Komunës tonë, i shpreh ngushëllimet më të thella familjes Sadiku, ndërsa nxënësve të lënduar ju uroj shërim sa më të shpejtë. /InLajmi/
