Ndërmjetësuesi i Bashkimit Evropian për dialogun Kosovë – Serbi, Miroslav Lajçak, thotë se Kosova dhe Serbia kanë listë të gjatë të obligimeve të papërmbushura nga marrëveshjet e kaluara.
Lajçak thotë se Kosovës tashmë i takon të nis procedurën për themelimin e Asociacionit, si dhe ta pranojë draf-statutin evropian, ai foli për median serbe Nova.
“Fokusi tani duhet të jetë në përparimin e zbatimit të plotë të Marrëveshjes pa parakushte e vonesa. Përgjegjësitë e palëve janë të qarta: i takon Kosovës të nis procedurën për themelimin e Asociacionit të komunave me shumicë serbe dhe ta pranojë draftstatutin evropian, dhe është në dorën e Serbisë të përmbushë obligimet e saj të shumta paralelisht, duke filluar nga njohja e simboleve të Kosovës, dokumentet dhe institucionet”, ka thënë Lajçak, transmeton Tëvë1.
Lajçak beson se edhe Kurti e edhe Vuçiqi mund të marrin vendime mbi normalizimin e marrëdhënieve pasi siç ka dhënë ai, “të 2 kanë mandate të fuqishme për të marrë vendime të vështira politike të cilat procesi i dialogut i kërkon pashmangshëm”.
