Ish deputeti i LDK-së, Naser Rugova, ka folur për liberalizimin e vizave, targat e njohjen e pasaportave të Kosovës nga ana e Spanjës, ku meritat për të gjitha këto po i merr Qeveria e Kosovës.Ai thotë se procesi i vizave ka përfunduar me 2018, ndërsa qeveria ka rol në largimin e targave ilegale, por që edhe ajo është veprim i marrëveshjes për normalizim.
“Së pari, liberalizimi i vizave është proces i filluar në vitin 2016, i përfunduar me 2018 me kritere të plotësuara. Qeveria ka një rol në largimin e targave me simbole serbe të qytetarëve serbë dhe tani targat janë ato zyrtare RKS, por edhe këtë veprim duhet parë në kuadër të procesit të dialogut dhe marrëveshjes për normalizim”, thotë ai.Ndërsa, sa i përket çështjes së pasaportave nga Spanja, sipas Rugovës, vendimi s’ka të bëjë me Qeverinë dhe këtë vendim qeveria e ka kuptuar me katër ditë vonesë shkruan Gazeta Blic.
“Sa i përket njohjes së pasaportës nga Spanja, ky vendim s’ka të bëjë fare me Qeverinë e Kosovës. Spanja ka njoftuar mekanizmat e BE-së se respekton marrëveshjen e Shengenit, qeveria e jonë ka kuptuar këtë lajm me 4 ditë vonesë. Por ky është lajm i mirë për qytetarët e vendit tonë. Në tërë këto procese, roli i qeverisë aktuale është irrelevant, përveç çështjes së targave”, deklaron Naser Rugova.
