Kylian Mbappe është njëri prej emrave më të përfolur për momentin derisa në futbollin evropian ka nisur afati kalimtar i janarit.
Ylli francez është duke i kaluar 6-të muajt e fundit të kontratës me Paris Saint-Germainin, ndërsa nuk e ka ndërmend ta vazhdojë atë, duke nënkuptuar se gjatë verës që vjen mund t’i bëjë valixhet gati dhe të largohet nga Parisi.
Përfaqësuesi francez foli mbrëmë për të ardhmen e tij pas triumfit në Superkupën e Francës, ndonëse nuk dha shumë detaje rreth vendimit.
“Unë nuk e kam marrë ende vendimin tim, por ne e kemi një marrëveshje me presidentin Al Khelaifi. Andaj, kjo nënkupton se të gjitha palët janë të mbrojtura”, deklaroi fillimisht ish-futbollisti i Monacos.
“Fokusi është te ekipi, e jo tek situata ime”, përfundoi Mbappe, shkruan GazetaExpress.
PSG-ja e mposhti mbrëmë Toulousen me rezultat 2:0 me golat e Kang-in dhe Mbappes për ta siguruar trofeun e parë sezonal.
