Nëse do të flasim për fundin e vitit, përtej fishekzjarrëve e dritave shumëngjyrëshe, ushqimi është mendimi i 2-të shumë i bukur.
Gatimet e mrekullueshme të festave të fundvitit duket sikur janë kombinuar bashkë për t’i bërë ditët e fundit të dhjetorit edhe më të bukura.
Gjeli i detit, pjata më e veçantë e kryesore, çdo vit zë vendin e tij në tavolinë dhe me siguri çdo vit kujdeseni që shija e tij të jetë perfekte.
Shumë e preferojnë në shijen e tij klasike, të pjekur mirë e me lëng.
Ndërsa për të gjithë ata që duan të provojnë një gatim më të veçantë, ju sugjeron recetën e sotme.
Mbushja e gjelit me gështenja është kombinimi më interesant i dimrit.
Kjo mënyrë e re do t’ju bëjë ta preferoni edhe më shumë këtë gatim tradicional e ikonë të festave të fundvitit.
Ndiqeni më poshtë mënyrën e saktë të përgatitjes
Përbërësit
1 gjel deti 5-8 kg
1,5 kg gështenja
800 gr bukë
150 gr gjalpë
500 ml verë ose ujë
1 limon
1 qepë
1 selino
1 tufë majdanoz
4 degë rozmarine
1 degë nenexhik
1 degë trumzë
vaj ulliri
kripë
piper i zi
Përgatitja
Për të nisur me përgatitjen e kësaj ju këshillojmë që të zieni gështenjat për rreth 45 minuta.
Ndërkohë lani dhe pastroni gjelin e detit me kujdes, e në fund lyejeni me lëng limoni nga brenda dhe jashtë.
Kur gështenjat të jenë zier, pastrojini ato nga lëkura sa më mirë të jetë e mundur dhe ndajini në gjysmë.
Më pas në një tigan, shkrini gjalpin dhe shtoni qepën e grirë hollë, bashkë me selinonë e prerë gjithashtu.
Lërini të skuqen derisa të zbuten në zjarr mesatar dhe në fund shtoni 250 ml verë ose ujë tek tigani.
Teksa prisni që masa e krijuar në tigan të avullojë, prisni bukën në kubikë të vegjël jo më shumë se 2-3 cm.
Këtë hap mund ta bëni edhe me kulaçin tradicional që zakonisht shoqëron gjelin e detit.
Shtojeni bukën tek tigani, bashkë me gështenjat, majdanozin, nenexhikun dhe trumzën.
Përziejini mirë të gjithë përbërësit e në fund shtoni sipas dëshirës kripë dhe piper të zi.
Lërini të gjithë këta përbërës të gatuhen përreth 5 minuta, më pas hiqini nga zjarri që të ftohen.
Kur të shikoni që mbushja është ftohur merrni gjelin e detit dhe mbusheni mirë të gjithin nga brenda.
Në fund qepeni gjelin me pak spango kuzhine, me pe ose kapeni me shkopinj të hollë druri, në mënyrë që mbushja të mos dalë jashtë gjatë pjekjes.
Vendoseni gjelin në një tavë të madhe të lyer me vaj ulliri, shtojini sërish sipër kripë, piper të zi dhe disa fije rozmarinë.
Sipas dëshirës lidheni sërish me spango edhe ng jashtë, në mënyrë që të qëndrojë i mbledhur dhe të marrë aromën e erëzave sa më mirë.
Për pjekjen
Futeni në furrë në temperaturën 180 gradë C dhe lëreni të piqet për 1 orë.
Pas kësaj kohë hapeni furrën dhe shtoni edhe 250 ml të tjera verë ose ujë dhe futeni sërish të piqet për 2 orë e gjysmë duke e spërkatur herë pas here me lëngun e tij.
Lëreni të piqet derisa të shikoni që mishi është zbutur plotësisht dhe ka marrë ngjyrë të artë në pjesën më të madhe të tij.
Kur ta nxirrni nga furra lëreni të ftohet për disa minuta, më pas mund ta shërbeni sipas dëshirës.
Bëni kujdes që më parë të prisni me gërshërë kuzhine spangon me të cilën lidhët gjelin dhe pjesën e mbushjes ose të hiqni shkopinjtë e drurit.
