Gjatë konferencës së përbashkët me ministrin e Brendshëm Xhelal Sveçla, kryeministri Kurti kritikoi Prokurorinë e Shtetit rreth hetimeve që po zhvillohen për sulmin e 24 shtatorit në Banjskë të Zveçanit, raporton InLajmi.
Në fjalën e tij Kurti tha se i është dërguar Prokurorisë i gjithë informacioni që Qeveria ka rreth këtij rasti. Më tutje ai shtoi se përkundër fakteve dhe dëshmive të shumta, numri i aktakuzave është mjaft i ulët. Ndërkohë Kurti theksoi se shteti është për të ndihmuar teksa kritikoi punën e deri tanishme të Prokurorisë për këtë rast.
“Nuk ka informacion të qeverisë së Kosovës lidhur me sulmin në Banjskë që nuk i është dhënë Prokurorisë së shtetit. Janë bërë 3 muaj prej se është kumtuar urdhri për sulmin terrorit ku u vra heroi Afrim Bunjaku. Ka panumër fakte, dëshmi materiale që janë mëse të mjaftueshme për ngritje të aktakuzave. Në përgjithësi, viti i kaluar ishte vit i barrikadave paraushtarake. Ishte vit i sulmeve terroriste, kriminale paraushtrake, por ka shpërputhje shumë të madhe midis fakteve e dëshmive në njërën anë dhe aktakuzave në anën tjetër. Është numër minor i njerëzve që ndodhen prapa grilave. Ky hendek s’mund të mbushet nga qeveria, por nga prokuroria”, tha Kurti.
Tashmë kanë kaluar 3 muaj nga sulmi në Banjskë të Zveçanit dhe ende ngjarja mbetet në hetime. /InLajmi/
