Atdhe Hetemi, drejtor i Institutit për Krime Lufte, ka thënë se nuk do të jetë e lehtë që të sigurohen dëshmi për këto krime, pasi një pjesë e dëshmive mund edhe të jenë humbur.
Por, siç tha ai një pjesë e tyre janë koleksionuar nga individë, organizata dhe institucione të caktuara.
“Padyshim që do të jetë e vështirë dhe ne as nuk guxojmë që të pretendojmë që një gjë e tillë është e lehtë… Unë besojë që më gjithë faktin që është e vështirë dhe ndoshta ndonjë sasi e dokumenteve apo dëshmive të krimeve të luftës mund të jetë humbur, apo zbehur për shkak të kohës, por unë prapë them është fat në fatkeqësi për neve që kemi një numër të institucioneve, organizatash apo individësh të caktuar, të cilët kanë arritur që të koleksionojnë një sasi të caktuar të dëshmive apo dokumentacionit”, ka deklaruar ai.
Ai në emisionin “Ditari” në Tëvë 1 tha se instituti duhet që të shërbejë si një lloj pike grumbullimi i këtyre materialeve dhe që me anë të tyre gjeneratat e reja ta kuptojnë të vërtetën.
“Instituti përveç që do të arkivojë apo do të krijojë material për hulumtim për hulumtuesit, apo për institucione të tjera të drejtësisë, unë mendojë që ne duhet që të arrijmë që të koleksionojmë material që t’i shërbenin p.sh shtëpive filmike apo regjisoreve të ndryshme për prodhimin e dramave e kështu me radhë. Ideja është që të gjejmë forma sa më të avancuara për të vërtetën tonë, realisht ta ruajmë… ta ndajmë edhe për gjenerata të tjera”, ka thënë ai.
Qeveria e Kosovës ka themeluar Institutin për adresimin e krimeve të Serbisë në luftën e viteve 1998-99 në Kosovë.
Kryeministri i Kosovës, Albin Kurti, ka thënë se Serbia duhet të mbahet përgjegjëse për krimet e kryera në luftën në Kosovë dhe themelimi i këtij instituti është në kuadër të angazhimit të Qeverisë për të matur dëmet e shkaktuar nga Serbia.
Kurti tha se me këtë rast u bë edhe një hap për ruajtjen dhe mbrojtjen e kujtesës kolektive e cila do t’i shërbejë qytetarëve dhe brezave të ardhshëm.
“Krimet e luftës, krimet kundër njerëzimit dhe gjenocidi nuk janë të shkuara. Plagët e luftës janë të thella dhe ende të pranishme. Është e pafund dhimbja. Duke dokumentuar krimet dhe dëmet e luftës ne edhe e ndajmë dhimbjen edhe e bëjmë më gjerësisht të njohur historinë tragjike të shqiptarëve të Kosovës në raport me Serbinë kriminale. Kjo vlen për ta ruajtur historinë dhe për ta kujtuar të shkuarën”, theksoi Kurti.