Aksidenti i fundit që ndodhi në Autostradën “Ibrahim Rugova” ka ndodhur për mungesë të sinjalizimit të mjaftueshëm, por edhe mjegullës dhe akullit të zi. Kështu deklaroi eksperti i komunikacionit, Nol Dedaj.
Ai këto komente i bëri në “Info Plus” të RTK-së. Dedaj tha se është i pashmangshëm aksidenti në këto situata.
“Ne e quajmë edhe si faktor incident. Akulli i zi krijohet në intervale shumë të shkurtëra kohore duke pasur parasysh edhe kushtet atmosferike si temperaturat e ulëta dhe mjegullat e dendura. Kjo e bënë mandej që edhe shtresa e sipërme e akullit të jetë e hollë dhe sistemi i frenimit nuk e ka më efektin e vet. Në këto situata i vetmi shans për t’ju shmangur aksidenteve është distanca e sigurisë”, tha ai.
Sipas tij, institucionet e vendit në vende të tilla si në ura dhe hijezime në segmente të shkurtëra duhet të krijojnë harta digjitale dhe drejtuesit e automjeteve në mënyrë automatike të informohen se ku mundet me qenë një pikë e zezë.
Po ashtu, ai tha se në Kosovë duhet të ekzistojnë edhe institutet profesionale.
“Institutet i hulumtojnë faktorët e tillë që mund t’i shkaktojnë aksidentet dhe mos të përsëriten më raste të tilla. Ata e çojnë në agjenci, e kjo e fundit e ka buxhetin i cili do të merret me to. Në situata të tilla agjencia është dashur të hartojë hartat digjitale”, potencoi ai.
Dedaj tha se 40% sinjalizimit mungon në territorin e Kosovës vetëm në rrugët regjionale, nacionale dhe në autoudha.
Sot 14 automjete u përfshinë në një aksident zinxhiror në autostradën “Ibrahim Rugova”. Nga ky aksident sipas policisë u raportua për persona të lënduar. Ndaj Policia e Kosovës ka apeluar për kujdes të shtuar në komunikacion.
