Lavdim Makshana, Hulumtuesi i Lartë në Institutin e Kosovës për Drejtësi (IKD) tha se luftimi i korrupsioni dhe krimit të organizuar janë kriteret themelore për anëtarësimin e Kosovës në Bashkimin Evropian (BE).
“Çështja e sundimit të ligjit, lufta e korrupsionit, lufta ndaj krimit të organizuar, kanë qenë kriteret apo kushtet themelore. Kanë qenë dhe mbeten ende për anëtarësim në Bashkimin Evropian”, tha Makshana.
Mes tjerash, ai potencoi se sundimi i ligjit dhe çështja e asociacionit janë po ashtu 2 kushtet kryesore për anëtarësim të Kosovës në Këshillin e Evropës.
“Nëse e lexojmë raportin e Këshillit të Evropës janë 2 çështje kryesore që përmenden apo 2 kushtet kryesore për anëtarësim në Këshillin e Evropës, pra është çështja e asociacionit dhe çështja e sundimit të ligjit, po ashtu si kritere shtesë ka qenë çështja e zbatimit të vendimit të Gjykatës Kushtetuese për Manastirin e Deçanit”, tha tutje ai.
Sa i përkit dënimeve për rastet e korrupsionit, hulumtuesi i IKD-së, tregon se as këtë vit por as vitin tjetër nuk janë dhënë dënime efikase.
Ai tregon se 60% e rasteve të korrupsionit vitin e kaluar janë dënuar vetëm me gjoba.
“Ne edhe sot nuk kemi asnjë aktgjykim me dënim efektiv ndaj një zyrtari të profilit të lartë për korrupsion. Përkundër që ka pasur aktakuza gjatë viteve, kanë dështuar raste, kemi pasur dënime por nuk kemi pas dënime efektive as deri më sot. Çka thuhet në Raportin e Progresit janë kritika të cilat në vazhdimësi Instituti i Kosovës për Drejtësi i ka parë edhe në terren gjatë monitorimit. Nëse ndalemi tek politika ndëshkimore rastet e korrupsionit i ke të gjitha, edhe vitin e kaluar edhe këtë vit, mbi 60% e dënimeve kanë qenë me gjobë, mbi 65% e dënimeve këtë vit kanë qenë më gjobë dhe dënime më kusht pra jemi t’u fol për raste të korrupsionit”, ka deklaruar Makshana.
Ai ka theksuar e në gjykata ka raste të korrupsionit të cilat kanë kaluar dekada dhe ende nuk kanë marrë epilog.
“Kemi raste në gjykatë, raste të korrupsionit që tash më kanë kaluar në dekada, ka raste aktive në gjykatë prej vitit 2008 të korrupsionit kjo tregon efikasitetin e gjyqësorit ndaj rasteve të korrupsionit. Edhe për kundër që Këshilli Gjyqësore dhe Prokurorial kanë miratuar politika të ndryshme për prioritizim të rasteve të korrupsionit”, theksoi ai.
Lëvizja FOL, të premten ka organizuar tryezën me temë diskutimi “Ndikimi i korrupsionit në negociatat për anëtarësimin e Kosovës në Bashkimin Evropian”, aktivitet ky në kuadër të “Javës Kundër Korrupsion 2023”, e cila organizohet me moton “Bashkë kundër Korrupsionit”, nga Koalicioni i Organizatave të Shoqërisë Civile, i përbërë nga Instituti i Kosovës për Drejtësi (IKD), Lëvizja FOL dhe Iniciativa për Progres (INPO).
Java Kundër Korrupsion organizohet falë mbështetjes së Departamentit të Shtetit Amerikan – Byrosë për Çështje të Narkotikëve Ndërkombëtarë dhe Zbatimit të Ligjit (INL).
