Në Dhomat e Specializuara të Kosovës DHSK në Hagë, duke folur për rolin e ish- Presidentit Hashim Thaçit, që ka pasur në Qeverinë e përkohshme të Kosovës, dëshmitares Sandra Mitchell iu prezantua edhe një video e tij, e 2 korrikut 1999, ku Thaçi kishte kërkuar nga popullsia qofshin ata civilë apo ushtarakë, të mos ndërmarrin akte dhune ndaj fqinjëve të tyre.
“I lusim të gjithë qytetarët e Kosovës, qofshin ata civilë apo me status ushtarak, të përmbahen dhe të ndikojnë tek të tjerët që të mos ndërmarrin akte dhune ndaj fqinjëve të tyre. Meqë veprimet e tilla janë të papranueshme, përgjegjësit e krimeve të tilla do të sillen para drejtësisë”, kishte thënë Thaçi, në këtë takim që ishte mbajtur mes përfaqësuesve shqiptarë dhe atyre serbë të Kosovës.
Në këtë takim, Thaçi kishte thënë se insiston që të gjithë njerëzit e zhdukur t’i dorëzoheshin përfaqësuesve të UNMIK-ut, duke theksuar që nuk është e vërtetë që ka ekzistuar urrejtje e natyrshme në mes etnive.
“Insistoj gjithashtu që të gjithë njerëzit e zhdukur t’i dorëzohen përfaqësuesve të UNMIK-ut, ne i përkrahim përpjekjet e përbashkëta që tani janë ndërmarrë nga aktivitetet e bashkësisë shqiptare, por se si edhe bashkësive të tjera që së bashku me UNMIK-un dhe organizatat e tjera ndërkombëtare, t’i realizojmë këto kërkesa. Rruga e pajtimit do të jetë e gjatë dhe e vështirë. S’është e vërtetë që ekziston një urrejtje e natyrshme në mes njerëzve në Kosovë”, kishte thënë Hashim Thaçi.
Ndërsa, përfaqësuesi serb kishte thënë se personat e dyshuar për krime lufte dhe krime kundër njerëzimit, do të dalin para drejtësisë.
“Personat e dyshuar për krime lufte dhe krime kundër njerëzimit do të nxirren para drejtësisë, ne mbështesim tribunalin ndërkombëtar penal” kishte thënë ai.
Megjithatë, për sulmet kundër serbëve që pretendohet që kanë ndodhur pas mbarimit të luftës, shqiptarët, në një artikull të Reuters potencohej se Thaçi ishte distancuar.
“Qeveria e përkohshme e Kosovës dhe unë personalisht distancohemi nga këto akte. Nuk do të lejojmë anarki në Kosovë”, citoi Koehe, që sipas tij e ka thënë Thaçi.
Dëshmitarja Mitchell tha se kjo përputhet me ato se ajo është në dijen t’i ketë thënë Hashim Thaçi në këto kohë.
Pas kësaj, Keohe prezantoi një video të 6 korrikut 1999, në të cilën Hashim Thaçi kishte dalë publikisht në emër të tij dhe Qeverisë, duke u distancuar nga veprimet e shqiptarëve që po ndodhnin në mbarim të luftës.
“Është e vërtetë që kohëve të fundit, sidomos pas përfundimit të luftës, në veçanti këto ditët e fundit kemi pas një dukuri jo të mirë, jo të ndershme, jo të përgjegjshme, për situatën nga individë apo grupe të caktuara të cilët janë marrë me thyerje të banesave, me keqpërdorime të simboleve të Ushtrisë Çlirimtare të Kosovës, me plaçkitje, thyerje, djegie, shkatërrime. Po ashtu, edhe me thyerjen e monumenteve dhe busteve të bëra nga serbët, kjo është një dukuri që neve na ka penguar dhe na ka shqetësuar. Qeveria e përkohshme e Kosovës dhe unë distancohem nga veprimet e tilla të pandërgjegjshme”, kishte thënë Thaçi në konferencën, për të cilën Mitchell tha se nuk e kishte parë.
Duke folur për rolin e Qeverisë së përkohshme të Kosovës, Mitchell pohoi se ata nuk kishin kompetenca që t’i hetonin krimet e luftës, kështu që kishin kërkuar që ta bënin autoritetet ndërkombëtare në Kosovë.
Veç tjerash gjatë seancës, Mitchell pohoi se kishte mashtrues të cilët blinin uniforma të UÇK-së në tregun e Shqipërisë për 50 marka gjermane. Sipas asaj që u tha, Mitchell pranoi se kishte dijeni se këta persona ishin edhe shqiptarë të Shqipërisë dhe qasja deri tek uniforma e UÇK-së ishte e lehtë, shkruan Betimi për Drejtësi.
Ndryshe, të gjitha dokumentet nga raportet e OSBE-se apo të tjera që iu prezantuan dëshmitares, u pranuan si prova materiale, duke përfshirë edhe videot.
