Njohës të çështjeve politike në vend, vlerësojnë se Qeveria nuk mund të shmangë shpalljen e zgjedhjeve të reja në komunat veriore.
Sipas tyre, kjo pritet të bëhet pasi të arrihet pajtueshmëri përfundimtare ndërmjet Kosovës dhe Serbisë.
Ndërkaq njohësit e proceseve zgjedhore në vend, vlerësojnë së mënyra më e lehtë për shpalljen e zgjedhjeve është që kryetarët aktualë të ofrojnë dorëheqje në mënyrë vullnetare.
Bashkësia ndërkombëtare vazhdon të bëjë presion mbi institucionet e Kosovës që sa më parë t’i shpallin zgjedhjet në 4 komunat veriore, që sipas tyre, është obligim i institucioneve vendore.
Njohës të çështjeve politike në vend, vlerësojnë së Kosova nuk mund t’i shmanget shpalljes së zgjedhjeve në komunat veriore. Analisti politik, Artan Muhaxheri, i tha Radio Kosovës se zgjedhjet e reja në veri janë një kusht i patejkalueshëm për Qeverinë e Kosovës, pasi kjo do të fillojë normalizimin e gjendjes, pas zhvillimeve të fundit në Banjskë.
“ Zgjedhjet në veri janë një kusht i patejkalueshëm për Qeverinë e Kosovës nga ana e aleateve tanë. Absolutisht nuk mund të shmangët ky proces. Realizimi i tij varet nga presionet që do të vijnë nga Uashingtoni dhe Brukseli, sepse është një etapë që do të nisë një normalizim të situatës në atë pjesë të Kosovës pas zhvillimeve të fundit në Banjksë”, tha ai.
Njohësi tjetër i çështjeve politike, Gazmir Raci, i tha Radio Kosovës së zgjedhjet e parakohshme në 4 komunat në veri të vendit, do të shpallen vetëm kur të arrihet pajtueshmëri përfundimtare për 3 marrëveshjet e arritura me herët ndërmjet Kosovës dhe Serbisë.
“Unë nuk pres zgjedhje të parakohshme në 4 komunat të pjesës veriore, përderisa nuk arrihet pajtueshmëria përfundimtare për planin Franko – Gjerman, Aneksin e Ohrit dhe propozimin e fundit që ka bërë bashkësia ndërkombëtare ndaj Kosovës dhe Serbisë. Nëse rrumbullakohen këto 3 marrëveshje, atëherë do të krijohet klima për mbajtjen e zgjedhjeve në këto katër komuna”, tha ai.
Ndërkaq, njohësi i proceseve zgjedhore në vend, Eugen Cakolli, nga Instituti Demokratik i Kosovës, i tha Radio Kosovës së janë disa mënyra për të shpallur zgjedhjet në veri të vendit, dhe se mënyra më e lehtë do të ishte që kryetarët aktualë të ofrojnë dorëheqje në mënyrë vullnetare.
Kryetarët shqiptarë në komunat veriore që dolën nga zgjedhjet e 23 prillit të bojkotuara nga serbët, u dërguan në zyrat e komunave veriore me mbështetjen e policisë.
Ndërkohë, ditë më parë Lista Serbe partia kryesore e serbëve në Kosovë, që ka mbështetjen e Beogradit zyrtar, më 13 tetor, njoftoi se është e gatshme të marrë pjesë në zgjedhjet e reja në komunat në veri.
