Presidenti i Serbisë, Aleksandar Vuçiq, tha sot në Pekin se Serbia dëshiron formimin e Bashkësisë së Komunave Serbe dhe zbatimin e Marrëveshjes së Brukselit, e cila është e vetmja e nënshkruar, transmeton Inlajmi.
“Edhe biseda më e keqe është më mirë se mos të bisedohet fare”, u tha Vuçiq gazetarëve në Pekin.
I pyetur për akuzat se po ushtron presion ndaj serbëve të Kosovës që të marrin pjesë në zgjedhje, Vuçiq tha se herën e kaluar ka qenë për pjesëmarrjen e serbëve në zgjedhje, por se ata kanë qenë kundër dhe se i përkrah të gjitha vendimet e përfaqësuesve serbë.
Vuçiq shtoi se do të mbështesë çdo vendim të serbëve të Kosovës, edhe kur nuk është mirë për ta apo për Serbinë në tërësi, sepse duhet të jemi me ata njerëz edhe kur është e vështirë edhe kur është e lehtë.
“Unë kurrë nuk e detyroj askënd, as nuk mund ta bëj këtë, as nuk jam pronar i jetës dhe i së ardhmes së tyre. Thashë se mendoj se rrethanat kanë ndryshuar, se do të ishte mirë të mendonin dhe këtë po ua kërkoj”, tha Vuçiq, shkruan Dasnas.
I pyetur për zgjedhjet në Serbi dhe parashikimin e rezultateve, Vuçiq tha: “Loja ende nuk ka filluar, do të shohim atje më 1, 2, 3 (nëntor) kur të fillojë ndeshja. Do të shohim se çfarë do të thotë populli”.
