Gati 3 vjet pas arrestimit nga Dhomat e Specializuara, ish-Presidenti i Kosovës, Hashim Thaçi ka dhënë një intervistë nga Haga, ku ndër të tjera ka folur për familjen e tij.
Mallin për familjen e ka përshkruar me fjalët më prekëse. Ka përmendur diplomimin e djalit të tij, Endrit Thaçit, në të cilin nuk ka mundur të marrë pjesë.
“Për familjen, të rri dhe të bisedojë i lirë me ta: Lumen, Endritin, i cili tani u rrit dhe u bë burrë, të merrja pjesë në ceremoninë e tij të diplomimit, të shëtisja maleve, bjeshkëve të bukura të Kosovës, të përcillnim ndeshje futbolli së bashku, apo të kalonim së bashku ndonjë ditë skijimi në bjeshkët e Brezovicës. Të bisedonim për ëndërrat e tij jetësore, apo për ndonjë film apo libër etj”, ka deklaruar Thaçi në një intervistë për Nacionalen.
Vizitën e prindërve gjatë vitit të kaluar, e ka quajtur emocion të veçantë dhe të paharrueshëm
“E di që mallëngjimi është deri diku dobësi, por paraqet edhe njerëzi: jemi njerëz nga mishi dhe gjaku. Po, më ka marrë malli për prindërit të cilët kanë hyrë në fazën e moshës së thyer, edhe pse flas shpesh përmes telefonit. Ardhja e tyre vitin e kaluar këtu në vizitë ishte një emocion i veçantë dhe i paharrueshëm”, ka thënë Thaçi në këtë intervistë.
Ndërkaq, për vizitën e tij në muajin maj, ka thënë se paraqet mrekulli të jashtëzakonshme njerëzore.
“Vizita ime para do kohësh, më 29 maj 2023, e cila u krye në ruajtje dhe shoqërim të DHSK, në vendlindje në Burojë, biseda me prindërit, për disa orë, paraqet një mrekulli të jashtëzakonshme njerëzore. Koha dhe biseda me ta ishte më e veçanta në jetën time. Evokuam kujtime të së kaluarës, biseduan për rrethin e ngushtë dhe të gjerë familjar, për të sotmen, por edhe për të ardhmen. Janë të bekuar që kanë plot mbesa e stërmbesa, nipa e stërnipa. Po e jetojnë pleqërinë të qetë, krenarë dhe dinjitozë.
Jam i mallëngjyer për njerëzit që i dua dhe më duan, që më besuan për më tepër se dy dekada, në procesin e përbashkët të ndërtimit të Kosovës së lirë, të pavarur, tolerante, zhvillimore”, ka deklaruar Thaçi.
