Ikja e të rinjve nga vendi është bërë shqetësim i madh.
Madje, numri i tyre që po e lëshojnë vendin për një jetë më të mirë dita-ditës po rritet.
Në media janë publikuar disa statistika ku thuhet se sipas të dhënave nga statistikat e Shengenit, Kosova është në vendin e parë sa i përket kërkesave të qytetarëve për të marrë vizë qëndrimi.
Vetëm vitin e kaluar kanë aplikuar për vizë qëndrimi 6.891 persona për 100 mijë banorë.
Numri i përgjithshëm i kërkesave nga Kosova, e cila ka 1.7 milionë banorë, ka arritur në 121.972, që është 6.8 % e popullsisë.
E, kosovarët do të vazhdojnë të bëjnë kërkesa për viza edhe për disa muaj.
Kjo, për shkak pasi që Kosova për dallim me vendet e tjera ta Ballkanit është i vetmi vend ne rajon i izoluar nga BE, të cilët nuk e gëzojnë lëvizjen e lirë.
Vetëm, nga janari i vitit 2024 kosovarët do të mund të lëvizin lirshëm.
Arifi: Pas liberalizimit të vizave, lëvizja e kosovarëve për në vendet e BE-së do të shtohet
Profesori i marrëdhënieve ndërkombëtare, Dritëro Arifi ka thënë për Front Online, se nga fillimi i vitit të ardhshëm lëvizja e qytetarëve nga Kosova për në vendet e Bashkimit Evropian do të jetë më e madhe.
“Po, normalisht që pas liberalizimit të vizave do të ketë një lëvizje më të shtuar, po themi një frekuentim të qytetarëve kosovarë drejt Bashkimit Evropian. Normalisht njerëzit që vendosin të emigrojnë janë shumë faktorë dhe shumë arsye që ndikojnë për një vendim të tillë dhe duhet kuptuar që e para është gjithmonë ai elementi ekonomik se pse njerëzit emigrojnë, pra elementi ekonomik është baza, është siguria sociale e të tjera”, është shprehur Arifi.
Ndërsa, shton se emigrimi është fenomen global dhe nuk mund ta ndalë askush.
“Me liberalizimin e vizave normalisht pres një frekuentim më të shtuar dhe më të rritur të lëvizjes apo dëshirës për ta parë Evropën, por edhe nuk pres që do të ketë një impakt të madh në ikjen e njerëzve sepse emigrimi është një fenomen global dhe nuk mund të ndalet, pro mund të prodhojmë politika më të mira brenda vendit”, ka thënë ndër të tjera ai.
Profesori Arifi ka treguar edhe arsyet se përse të rinjtë po e lëshojnë vendin.
“Pra në momentin ku në një ambient paga është shumë e vogël për të mbuluar shpenzimet mujore atëherë njerëzit do të mundohen të gjejnë alternativa të tjera, pra që i bie emigrimi jashtë Kosovës dhe normalisht duke e ndërlidhur edhe me çështje të shëndetësisë, sociale dhe të edukimit. Njerëzit në Kosovë në një formë apo tjetër e kanë humbur besimin në këto shtylla kryesore që i suporton shteti dhe në një farë mënyre ky ndryshim i madh si rrjedhojë sjellë edhe vendimin më të lehtë për të emigruar nga Kosova”, ka shtuar Arifi.
Azemi: Nga viti 2014-2022 Kosovën e lëshuan 324 mijë punëtorë, edhe në 2024 do të ndodhë njëjtë
Që do të këtë trend pothuajse të njëjtë të ikjes së punëtorëve nga Kosova edhe në vitin 2024 e thotë për kryetari i Sindikatës së Punëtorëve të Sektorit Privat, Jusuf Azemi.
“Sa, i përket ikjes unë mendoj se edhe pa liberalizim të vizave fare ne kemi një mungesë të punëtorëve, kemi një ikje të rinjve dhe kjo gjë vërehet kudo qoftë. Unë mendoj se edhe në vitin 2024, ne presim një trend pothuajse gati të njëjtë sepse edhe ashtu gjithë ata që kanë pas mundësi kanë ik dhe nuk e kanë prit momentin e fundit”, thotë Azemi.
Ai, ka treguar se për këtë vit nuk kanë ende statistika të sakta se sa punëtorë e kanë lëshuar vendin, por ka treguar statistikat prej vitit 2014 deri në vitin 2022.
“Që nga viti 2014 e deri në fund të vitit 2022 janë 324 mijë po themi kryesisht punëtorë që kanë ik nga Kosova. Vitin e kaluar janë 63 ose 64 mijë punëtorë që e kanë lëshua Kosovën, përderisa në vitin 2021 kanë qenë 42 mijë e 730 punëtorë, pra këto janë shifrat e sakta” , ka deklaruar ai.
Shteti gjerman synon të lejojë mbi 50 mijë punëtorë të pakualifikuar nga Ballkani Perëndimor që të punojnë atje.
Kjo është bërë e ditur ditë në prill të këtij viti derisa është ndryshuar projektligji për migracion.
