Kryetari i LDK-së, Lumir Abdixhiku, ka thënë se përpara fillimit të vitit të ri shkollor, vendi do të duhej të kishte brengen e digjitalizimit të shkollave, për klasë me 20 nxënës, për kodimin si lëndë obligative e për inteligjencën artificiale si subjekt mësimi.
Por, sipas Abdixhiku, qeveria ka vendosur të ngarkojë secilin prind me detyra të vetë shtetit – blerjen e librave, të cilat sipas tij, krijuan paqartësi, bartje nëpër librari e aplikime për rimbursim.
“Ky është rasti i Arbërores dhe Muhametit; dy prindërve nga Prishtina; dhe përpjekjes së mundimshme të tyre për t’i siguruar librat e klasës së tretë; pak ditë para nisjes së vitit shkollor”.
“Pamjet që po i shihni janë pamje të përpjekjes së përditshme të prindërve kosovarë të cilët, pa asnjë nevojë e asnjë logjikë, u bënë subjekt i eksperimentit komplikues të Qeverisë”, shkroi Abdixhiku, transmeton Klankosova.tv.
Tutje, ai tha se nën paranojën e përfitimeve të biznesit, pushteti siç e quajti, popullist kishte dështuar një proces që çdo vit kryhej krejt normalisht.
“Ironikisht, në gjithë këtë proces, të vetmit përfitues mbetën pikërisht këto biznese. Në fund, librat u blenë te ata. Dhe, siç kuptuam nga vendimi i vet Qeverisë, në vend të 4.8 milionëve tani do t’i përfitojnë mbi 6 milionë euro si subvencionim”.
“Paaftësia pra kushton. Paranoja dhe më shumë. Por sot, çfarë na kushton më së shumti është koha. Ajo po na rrëshqet para syve. Do të duhej të flisnim për fëmijët tanë si forcë moderne që bën të ardhmen tonë”, tha Abdixhiku.
Ai tha se në vend të gjërave të tjera, prindërit e nxënësit po merren me blerjen e librave dhe maltretimit të panevojshëm.
“Do të merremi me ballafaqime të tilla sepse është mendësia e mospunës, ankesës e paranojës që s’lë shtetin e shoqërinë të bëjë zhvillim. Prandaj, e djathta është zgjidhja e Rruga e Re është përgjigjja”, tha ai.
