Shkruan: Blerim Valla
Sot më 28 gusht 2023 janë bërë 81 vite nga lindja e padyshim poetit më të shquar dhe më të njohur shqiptar, Ali Podrimja.
Ai ka lindur në Gjakovë më 28 gusht 1942 dhe ka vdekur më 21 korrik 2012 në qytetin Lodeve të Francës. Ai ka shkruar më shumë se dhjetë vëllime me poezi dhe është përfaqësuesi më i shquar i poezisë së sotme shqiptare, dhe poeti më i njohur dhe më i përkthyer shqiptar në arenën ndërkombëtare.
Më 1957 botoi poezinë e parë në revistën “Jeta e Re”. Kurse librin e tij të parë “Hija e tokës”, Ali Podrimja e shkroi në vitin 1960, kur ishte gjimnazist. Një vit më pas, më 1961, Ali Podrimja botoi përmbledhjen e parë me vargje elegjiake Thirrje. Më pas vijnë përmbledhjet Shamijat e përshëndetjeve (1963), Dhimbë e bukur (1967), Sampo (1969), Torzo (1971) etj, deri në veprën e tij më të mirë dhe më të njohur “Lum Lumi” (1982), që shënoi kulmin e tij si poet. Ky libër bëri një kthesë të madhe në letërsinë bashkëkohore të Kosovës, dhe i cili edhe sot e kësaj dite është padyshim libri më i mirë i poezisë moderne shqiptare.
Në vitet ’80 e ’90 – ta Podrimja do të shkruaj librat e tij më të njohur poetikë me çka u bë zëri më i veçantë i poezisë shqipe të shek. XX- të dhe XXI – të.
Më 18 korrik 2012, Ali Podrimja ishte zhdukur pas një festivali të poezisë në qytetin Lodeve të Francës. Pas kërkimeve të shumta, më 21 korrik 2012, u gjet trupi i pa jetë i tij. Ai vdiq në rrethana ende të pasqaruara.
Ndër veprat më të njohura të tij janë :
“Thirrje” 1961,
“Dhimbë e bukur” 1967,
“Sampo” 1969 ,
“Torzo” 1971,
“Folja” 1973,
“Credo” 1976,
“Sampo 2” 1980,
“Drejtpeshimi” 1981,
“Lum Lumi” 1982,
“Fundi i Gëzuar” 1988,
“Zari” 1990,
“Në bisht të sorrës” 1994,
“Buzëqeshje në kafaz” 1995,
“Ishulli Albania” 2003,
“Pikë e zezë në blu” 2005, e shumë të tjerë./InLajmi/
