Rreth 3 muaj më parë, australiani Tim Shaddock filloi një aventurë me qenin e tij, Bella. Në moshën 54-vjeçare, ai kërkoi një përvojë të re dhe prillin e kaluar ai hipi në varkën e tij, në La Paz, në shtetin meksikan të Baja California Sur, me objektiv për të arritur Polinezinë Franceze. Një udhëtim prej më shumë se 6.000 kilometrash.
Por, brenda pak javësh udhëtimi pësoi një pengesë të papritur. Një stuhi e fortë në ujërat e Oqeanit Paqësor dëmtoi rëndë varkën. I mbijetuari mbeti pa komunikim, “në një situatë jashtëzakonisht të pasigurt, pa furnizime apo strehë”. Gjatë këtyre 3 muajve ai arriti të qëndronte gjallë, së bashku me kafshën e tij, duke ngrënë peshk të gjallë dhe duke pirë ujë shiu.
Për fat të mirë, historia e këtij australiani pati një fund të lumtur. Këtë javë ai u pa dhe u shpëtua nga një anije meksikane, e cila e gjeti atë duke lundruar në ujërat ndërkombëtare. Pas një udhëtimi të gjatë, Shaddock tashmë ka shkelur në tokë dhe ka treguar se si ishte përvoja e tij.
“Ka qenë një sprovë. Kam kohë që jam vetëm në det të hapur”, tha ai për 9News.
Kompania e peshkut që e gjeti, siguron se ai ishte në një situatë të keqe, për këtë arsye iu dha kujdes mjekësor pas shpëtimit. Anija ishte në një udhëtim të zakonshëm peshkimi më shumë se 2000 kilometra nga bregu, kur disa anëtarë të ekuipazhit panë të humburin dhe ia raportuan kapitenit, Óscar Meza.
Pas gati 90 ditësh në një varkë të dëmtuar dhe pa mundësinë për të arritur në tokë, ai më në fund është i sigurt pas një përvoje nga e cila mendoi se nuk do të dilte i gjallë.
“Ndjehem mirë. Ndihem shumë më mirë se sa isha. Unë duhet të jem vetëm mirënjohës. Unë jam gjallë dhe me të vërtetë mendova se nuk do të isha”, tha ai sapo mbërriti në portin e Manzanillo, më shumë se 300 kilometra nga Mexico City.
Tani, Shaddock thjesht dëshiron të pushojë dhe të hajë mirë: “Kam kaluar një provë të vështirë në det të hapur. Më duhet vetëm pak pushim dhe ushqim i mirë, sepse kam kohë që jam vetëm në det”.
Por, situata e përjetuar nuk e pengon atë të mendojë për aventurën e radhës dhe tashmë po mendon të hipë sërish në katamaranin e tij, me të cilin ka udhëtuar vende të ndryshme të botës, shkruan A2CNN.
Australiani, i cili e përcakton veten si një person i qetë që i pëlqen të shijojë vetminë e oqeanit, arriti të shmangë djegien nga dielli falë një tende që ka në varkën e tij. I pyetur për arsyen e udhëtimit të tij, ai thotë se nuk është i sigurt nëse e ka përgjigjen: “Më pëlqen shumë lundrimi dhe i dua njerëzit e detit”.
