Shefi i Grupit Parlamentar të Aleancës për Aardhmërinë e Kosovës Besnik Tahiri, tha se Qeveria e Kosovës po vazhdon të eksperimentojë në rrafshin e brendshëm edhe në atë të jashtëm, duke marrë vendime në dëm të qytetarëve, raporton InLajmi.
Ai në një konferencë për medie tha se veriu i Kosovës është në dorë të askujt dhe se vendi rrezikon të kthehet në një zonë me Rezolutën 1244.
“Grupi Parlamentar i AAK-së ka thirrur këtë konferencë për të konfirmuar vazhdimin e këtij eksperimentimi që Qeveria Kurti po e bënë si në rrafshin e brendshëm si në atë të jashtëm. Kemi 2 kryetarë që janë të mbyllur tash e 2 muaj. Nuk kemi sundim të ligjit”, tha ai.
Tahiri tha se kurrë nuk kanë pasur pagë më të dobët në vend edhe pse qeveria po krenohet se është rritur paga minimale, duke shtuar se ekonomia vazhdon të jetë sektori më i sulmuar dhe se investime janë zero.
“Po e marr një shembull, tek policia e Kosovës 3 gradat e para kanë zvogëlim të rrogës. Ndërsa policët e lartë rrogën e kanë njësoj. Në rrafshin e drejtësisë në punë kurrë nuk ka pasur më pak drejtësi për punëtorët e sektorit privat. Me një mashtrim të paskupullt ku thonë se paga minimale është rritur” , shtoi tutje shefi i AAK-së.
Ai tha se paga minimale duhet të jetë 400 euro dhe se ligji i pagës minimale nuk ka asnjë efekt të vetëm në teren sepse nuk ka rrogë më të vogël se 260 euro. Ekonomua vazhdon të jetë sektori më i sulmuar.
“Le të gjejnë kryeministri dhe Ministri i Financave një person që ka pasur rrogë tani më pak se 264 euro. Investimet kapitale, tendenca për t’ia marrë komunave tregon që kjo qeveri shkelë të drejtat e sektorit privat e publik. Në rrafshin e brendshëm janë këto 3 tema të rëndësishme për ne. Bashkimi Evropian e ka sanksionuar shtetin më të ri, më demokratik me sanksione marramendëse”, u shpreh Tahiri.
Kur foli për refuzimin e pjesëmarrjes në takimin e ftuar nga Edi Rama, nga kreu i Qeverisë Albin Kurti, ai i ka bërë thirrje Qeverisë të ndalojë kolapsimin e vendit.
Ai tutje tha se është e papranueshme që Kosova të përjashtohet nga të gjitha tryezat dhe se kjo është logjikë inatçore dhe joshtetformuese.
“Ndërsa sfondin e parë, Qeveria e Kosovës nuk përfaqësohet me kryeministrin e saj, e organizatori, Qeveria e Shqipërisë detyrohet ta ndalojë një zyrtar të Qeverisë së Kosovës. Sot është dashur të mbahej mbledhja e Kryesisë së Kuvendit. A e shihni si është kuvendi i zbrazët, nuk është askush”, tha Tahiri/InLajmi/
