Presidenti i Serbisë, Aleksandar Vuçiq, pas takimit me kryeministrat e Holandës dhe të Luksemburgut, Mark Rutte dhe Xavier Bethel, është shprehur se me 2 kryeminstrat kanë biseduar për tema të rëndësishme edhe situatën në veri, transmeton InLajmi.
Vuçiq ka theksuar se gjatë diskutimit ai është shprehur se ka frikë nga papërgjegjshmëria e institucioneve të Kosovës lidhur me shtensionimin e situatës dhe në përgjithësi për zbatimin e marrëveshjeve.
“U premtova se Serbia do të bëjë çmos për të ruajtur paqen dhe stabilitetin”, theksoi Vuçiq në një konferencë të përbashkët për shtyp me Rutën dhe Bethelin në Pallatin “Serbia”.
Tutje ka shtuar Vuçiq se gjatë gjithë karrierës së tij politike nuk kishte parë një papërgjegjshmëri të tillë sikur kjo e Kosovës.
Për më tepër Vuçiq është shprehur i dëshpëruar për mos formimin e Asociacionit.
Ai ka theksuar se marrëveshja e Brukselit, e cila është ende në fuqi, nuk është zbatuar në pjesën e saj më të rëndësishme, që është themelimi i Bashkësisë së Komunave Serbe.
“Nëse më pyesni për dokumentin dhe zbatimin e gjithçkaje që është nënshkruar deri më tani, më duhet t’ju them se Marrëveshja e Brukselit që kemi nënshkruar 10 e më shumë vite më parë ka qenë dhe është ende në fuqi, ende nuk është zbatuar në pjesën më të rëndësishme të saj, që është themelimi i Bashkësisë së Komunave Serbe”, tha Vuçiq.
Vuçiq tha se formimi i Asociacionit ishte parakusht për çdo gjë tjetër dhe se në këtë fazë, siç tha ai, nuk ka as shpresë për formimin e Asociacionit/InLajmi/.
