Shefi i misionit të Organizatës për Siguri dhe Bashkëpunim në Evropë OSBE në Prishtinë, Michael Davenport, ka vlerësuar se nuk mund të ketë kthim në normalitet në veri të Kosovës derisa serbët të mos kthehen në institucione.
Davenport i cili më parë ka shërbyer në Beograd, fillimisht si ambasador i Britanisë së Madhe, e më vonë si shef i Delegacionit të BE-së, në një intervistë për Demostat, deklaroi se kryetarët e sapozgjedhur të komunave në veri janë zgjedhur ligjërisht, por se ata nuk kanë legjitimitet, pasi që zgjedhjet u bojkotuan nga shumica dërrmuese e serbëve.
Do të jetë e rëndësishme mbajtja e zgjedhjeve të reja, me pjesëmarrjen e përfaqësuesve të të gjitha komuniteteve nga veriu i Kosovës, tha Davenport.
Sipas tij, OSBE-ja, nëse të gjitha palët pajtohen, mund të ofrojë mbështetje për të lehtësuar procesin e riintegrimit të serbëve në veri të Kosovës.
Davenport tha se zgjedhjet lokale ishin të nevojshme pasi kryebashkiakët dhe këshilltarët në 4 bashkitë veriore dhanë dorëheqjen në nëntor. Kjo, së bashku me tërheqjen e shumë serbëve të Kosovës nga policia dhe gjyqësori, krijoi një vakum institucional dhe të sigurisë në komunat në veri, tha Davenport.
Ai vlerësoi se nuk mund të ketë kthim në asgjë që i ngjan normalitetit për qytetarët në veri derisa përfaqësuesit e të gjitha komuniteteve të marrin pjesë edhe një herë në institucionet e sigurisë publike, në gjyqësor, në zgjedhjet komunale dhe në administratë.
Në pyetjen se si do të kthehen serbët në institucione, në radhë të parë në pushtetin ekzekutiv, nëse zgjedhjet tashmë janë mbajtur, Davenport është përgjigjur se kjo duhet të diskutohet në kuadër të dialogut nën patronazhin e Bashkimit Evropian, përcjell GazetaBlic
.Davenport tha se Misioni i OSBE-së nuk është pjesë e procesit të hartimit të Statutit të Bashkësisë së Komunave Serbe, por se është i gatshëm të mbështesë zbatimin e marrëveshjeve të arritura në dialogun e ndërmjetësuar nga BE-ja.
